IFC外望——蘇寧無人店 消費「靠個樣」

  新零售概念在天貓雙十一推波助瀾下,成另一風潮,當中講得最多嘅無人商店技術,就愈嚟愈多商家採用,阿里巴巴嘅戰略合作夥伴蘇寧就係其中之一。蘇寧繼在南京及上海開設無人商店後,會喺北京、重慶及徐州再開三間。

  雖然喺蘇寧之前內地已有不少品牌起用無人商店,但多以此作噱頭,蘇寧董事長張近東則信心滿滿,講明唔係實驗用途,而係服務商業市場,睇中無人商店嘅模式可以複製,極具成本及技術優勢。

  常言道:「你的樣子如何,你的日子也必如何。」呢句說話喺未來嘅日子或會令人有更深體會,因為日後俾錢,連銀包都唔使攞出嚟,係商店入口通過APP綁定銀行卡、做完臉部識別之後,客人只需拎住商品走過付款區域,系統就會通過射頻識別技術(RFID)自動識別客人同商品,整個結帳流程15秒都唔使。更誇張嘅係,智能監控鏡頭同蘇寧開發嘅算法系統可以用嚟計算同分析店內客流,幫助改善產品擺放及營運。以後買嘢咁方便,又俾人tract(追蹤)住,會唔會更加容易變購物狂?

海航元老傳被免職

  內地巨企海航集團及海航旅業的元老級董事長辛笛,日前被內地媒體爆料指已被免職。

  海航回覆時就話,海航旅業是根據企業經營的實際需要,對部分幹部崗位進行調整,屬於正常人事的調整,變相確認事件。

  發言人仲話,該公司管理機制成熟,繼任的管理幹部在相關領域也具有豐富的管理經驗和能力,更認為該公司今後的管理水平將邁上一個新的台階。

  據內媒體指,海航集團在11月初的內部文件中已公布,辛笛已被免除一切職務和管理級別,即使在海航的官方網站上載有的辛笛的簡歷,該頁面也被撤下。據了解,在一般情况下,海航集團處罰員工都是先撤職,然後送去學習幾個月,回來後再安排其他工作,甚少會撤銷管理級別。今次海航旅業回應直言今後將邁進新台階,態度相當決絕。

高瞻

hd