中環IFC外望——中滔環保延派息 留銀彈抗波動市

  近期股市風高浪急,小股東諗住長揸股票收息,都未必可以太過「老定」。話說中滔環保(1363)原定喺下周三(10日)派中期息,點知前晚突然發出通告,話考慮到近期市況波動,為咗暫時維持集團嘅現金水平,就延至12月21日先派息,即係延後超過兩個月。至於合資格領取嘅股東,就仍然以9月27日股東名冊為準。

  中滔環保之前公佈業績嗰時,就話中期息有0.96仙,相當於總數6064萬元。雖然延遲派息嘅決定都幾突兀,但喺噚日嘅大跌市中,股價就未見有太大反應,收市報0.8元,跌3.6%,成交得130萬元。

  其實喺2016年11月,中滔環保畀著名沽空機構Glaucus Research狙擊,Glaucus列出中滔環保「七宗罪」,包括誇大污水處理廠使用率同埋盈利貢獻等。中滔環保發通告反駁指控,加上大股東頻頻增持,穩定市場信心,最後總算渡過難關。呢次股市大波動,中滔環保選擇延遲派息保留實力,希望最終都可以「大步檻過」啦!

港人嗌外賣 愛食雞翼同米線

  香港人叫外賣,最喜歡叫乜?原來係雞、雞翼同米線!網上外賣點餐平台Uber Eats進駐香港兩年,公司香港區總經理林灝哲表示,根據平台過去一年數據,香港人摯愛是米線、雞和雞翼,黑糖相關食品迅速「上位」,銷量增長三倍;一人餐最受歡迎的食物種類則是車仔麵、炸雞及水餃;更有位用戶一年內下單364次。

  林灝哲稱,除了辦公室一族使用平台點餐,Uber Eats逐漸「入屋」。Uber Eats現時服務範圍覆蓋全港七成住宅區,過去一年,火炭、荃灣、奧運及太古站的住宅區最多人使用Uber Eats。集團預期未來一至兩年做到全港覆蓋,而新投入營運的高鐵站已是覆蓋範圍。

  現時平台已登記外賣員有3.5萬人,其中六成是兼職,四成是全職;「步兵」每張單可賺25至30元,電單車外賣員可多賺三成。收入最高的外賣員兩年累計賺60萬,即平均一個月賺2.5萬元。

高瞻

hd