中環IFC外望——庫克現身上海 用Apple Watch搭船

  正當中美貿易戰打得如火如荼,蘋果公司行政總裁庫克(Tim Cook,見圖)突然喺上海出現,仲親身示範用Apple Watch喺渡輪碼頭過閘機坐船,然後去蘋果專門店視察。早前有內地網民揚言要抵制蘋果iPhone,作為貿易戰嘅反制手段。但係庫克喺上海「自由行」仲接受埋內地傳媒採訪,似乎蘋果公司生意照做,無受中美貿易戰影響。

  噚日朝早,庫克喺上海楊家渡渡口坐渡輪過黃浦江,前往蘋果喺南京東路嘅專門店考察。喺碼頭過閘機嘅時候,庫克梗係順便宣傳自家產品,用Apple Watch畀船費。事關Apple Pay支援上海公共交通支付系統,無論坐船、坐巴士以及大部份的士,都可以用Apple Pay畀錢。庫克仲話,上海公共交通乘客眾多,用Apple Watch或iPhone畀錢好方便。

  庫克喺渡輪上面,仲同攝影師陳曼交流,研究點樣用iPhone影相先至最靚。佢晏晝就仲出席一個用iPhone影相的攝影師嘅作品展O添。

證監會改標誌 化身「獵鷹」嚴打

  證監會近期頻頻出招嚴打「老千股」以及莊家證券行,一洗以往被動作風,噚日宣佈連標誌都要更改,要變身為「獵鷹」,可見證監會求變決心很大。

  證監會原本的標誌外型四四方方,很符合一貫給人「揸正嚟做」同「四平八穩」印象。至於新標誌則是一隻展翅飛翔,並正向下抓向獵物的獵鷹,像寓意要打擊市場違規行為。證監連標誌都咁進取,一眾市場違規者及莊家,真係要醒醒定定!

  證監會行政總裁歐達禮表示,香港證券市場變得更大、更複雜、和外界的連繫亦更緊密。因此,證監會必須時刻警覺,及早介入調查並且果斷執法。新標誌設計取材自經常盤旋在香港上空的飛鷹,以反映證監會在識別潛在威脅、打擊違規活動以及確保市場公平廉潔的決心。

高瞻

hd