中環IFC外望——小米語音助理臨場「甩碌」

          小米(1810)季績唔錯,股價升番唔少,仲頻頻有新動作㖭。好似小米董事長雷軍噚日喺北京舉行開發者大會,並宣佈同宜家家居合作,兩間公司將會一齊發展智能家居同物聯網(IoT)產品。不過,雷軍喺示範新產品的時候,就唔小心出現「蝦碌」事件。

搞到雷軍好尷尬

  話說雷軍喺會上問語音助理「小愛同學」(類似蘋果的Siri)做示範,佢問「三個木是甚麼字?」此時「小愛同學」應該答話係「森」,但係佢居然臨時「發台瘟」,一時話「木三分」,一時又用流行曲歌詞「你是電,你是光,你是唯一的神話」嚟回應,答案完全「無厘頭」,搞到雷軍好無癮。跟住雷軍再問佢數學題,諗住展示吓「小愛同學」嘅計算能力,點知今次仲慘,居然完全無反應,場面不知幾尷尬。

  講番小米同宜家嘅合作,初步係宜家全線智能照明產品,都可以同小米系統連接,可以用手機App或者語音控制開關同亮度。雖然示範環節有出錯,但無阻雷軍雄心壯志,佢話人工智能係大勢所趨,將來可以用語音控制各種家電,成本仲會不斷降低㖭。

毛記葵涌中期多賺1.6倍

  毛記葵涌(1716)公佈截至9月底止中期業績,受惠於期內開支減少及個別藝人收入帶動,按年多賺1.58倍,至887.7萬元。每股盈利3.29仙,不派中期息。

  受惠數碼媒體服務及其他媒體服務收入增加,毛記上半年收入按年增加12.9%至4810萬元。期內集團毛利率43.3%,較去年同期回落11.5個百分點。

  數碼媒體服務收益則增加8.3%至4140萬元。印刷媒體服務收益350萬元,下跌17%,虧損由去年同期的130萬元收窄至20萬元,主因集團將《100毛》雜誌,由印刷版轉為數碼版。對於其他媒體服務收入大增,集團解釋主因今年4月舉辦兩場共接待5000個觀眾的清談節目,貢獻大部份收益及除稅前溢利。

高瞻

hd