中環IFC外望——網傳賣枱填數 ofo急急澄清

          共享單車公司ofo近期經營困難,用戶排晒大隊要求退回按金。喺呢個危急關頭,估唔到有商家利用ofo「過橋」,話有ofo辦公室設備大平賣。不過ofo就急急澄清,話只係家具商人嘅推銷「噱頭」,同佢哋無關。

  噚日朝早內地網絡流傳,話喺內地二手貨品買賣平台閒魚網,有大批二手辦公室設備出售,仲話係來自ofo,標題仲寫明「ofo搬遷,批量二手辦公設備」,例如會議室所用嘅枱,標價由200幾蚊至1000幾蚊人民幣不等。

  不過,ofo就急急澄清,話坊間所謂「ofo二手家具」,只係商家宣傳伎倆,並不是真係嚟自ofo。ofo又話,部份所謂「ofo家具」,售價閒閒哋幾萬蚊人民幣,更加係無中生有。

  其實以ofo財務困難嚟講,所欠資金唔係一萬幾千,的確冇可能靠賣辦公室設備填數,賣張會議枱套現嗰一千幾百,只係夠退番按金畀幾個客戶,但O依家要求退款嘅人數,分分鐘超過1000萬人,真係賣幾多張書枱都唔夠填數。

上海車廠動工 Tesla料年底投產

  美國電動車公司Tesla喺上海興建超級工廠籌劃四年,噚日終於舉行動工儀式,並由Tesla行政總裁馬斯克親自出席。呢座超級工廠係Tesla首個海外生產基地,預計將耗資20億美元(約156.7億港元)。該基地位於臨港產業區,係上海歷來最大外資製造業項目,預計年底可以開始生產Model 3等車型。

  據報道,上海市委副書記兼上海市市長應勇都有出席,馬斯克就話,中國係全球電動車領導市場,上海超級工廠嘅奠基儀式係Tesla承諾擴大投入中國市場例證。馬斯克喺Twitter都話,今年稍後時間發表嘅新車款Model Y都會喺該廠生產。

  有經濟分析認為,Tesla動工時機非常差,喺中美貿易對峙情況下,中國消費力同汽車市場轉趨萎縮。不過,Tesla喺上海設廠,有望降低喺中國售價約四成,免受貿易戰關稅影響。

高瞻

hd