中環IFC外望——太地三月藝術活動多籮籮

  在本港芸芸地產商當中,太古地產(1972)可謂最注重推廣藝術文化,並積極將唔同文娛活動,融入旗下商場同寫字樓。喺即將來臨嘅3月,太地又有一連串活動推出,包括太古廣場將展出嚟自世界著名藝術活動火人祭(Burning Man)嘅巨型互動藝術裝置LUMENous GARDEN(見圖),藝術裝置將會隨參觀者走近而伸縮移動。

  灣仔星街小區就有另一個以環保藝術為主題嘅大型雕塑,紐約藝術家Derick Melander特別用由星街小區同太古地產旗下物業收集得來嘅舊物,堆疊成一件藝術創作,希望喚醒大家對紡織廢料嘅關注。

  其實太地同巴塞爾藝術展香港展會嘅合作,今年已經踏入第七年,一如以往,會場一樓平台將會設有太地貴賓室,舉行太古地產Dialogue Series一系列由藝術界重量級講者主持嘅講座及座談會,相信藝術愛好者都不容錯過。

牲畜識別技術防呃保險

  人臉辨識技術已經唔係新鮮事物,唔少國家嘅海關都用嚟檢查入境人士,而且好多手機品牌都已經採用作手機解鎖。不過,豬臉辨識、羊尾辨識技術大家又有冇聽過?原來,中國平安(2318)喺動物臉辨識技術已經發展得相當成熟,仲可以用嚟招徠生意!

  喺各行各業廣泛運用人臉識別技術嘅時代,連農業都不甘示弱,逐步應用領先牲畜識別技術。由於過往難以識別牲畜嘅擁有權,個別農戶可能存在保險詐騙情況,導致農業保險產品價格較高、理賠速度緩慢。

  有見及此,平保目前正利用牲畜識別技術,對乳牛嘅花紋、豬隻嘅臉部同尾部等動物特徵進行識別,有效解決以往人手識別面對嘅困難,進一步精準管理農戶飼養風險。通過呢啲領先技術和科技,農民可以通過合理成本買保險,以獲取更全面保障,達致「智慧扶貧」初心。

高瞻

hd