車位跌價潮最多達四成 師奶擁34摸頂貨「坐艇」

  八年前每個車位平均成交價約四十三萬,去年埋單已飆升至接近一百八十萬。不過隨着樓市回落,連帶車位亦驚現「冧價潮」。當中以炒得最癲的新界區最大鑊。據新一期《東周刊》報道,如「車位天堂」嘉湖山莊錄得多宗蝕讓、金獅花園車位最新成交價較高位大冧四成、沙田第一城車位四個月勁蝕十八萬。有師奶更於去年摸頂掃入超過三十個車位,如今全部「坐艇」。

  唱淡納米樓今年有機會大跌三成的「樓神」長實執董趙國雄,據知私下認為車位表現比納米樓更差。雖然近日股樓略為回暖,「車位大王」廖偉麟以及資深投資者林一鳴都直言車位「炒過龍」,估計今年起碼要跌兩至三成。

  近年銀行息低,不少市民驚銀紙貶值,加上政府推出辣招壓抑樓市,於是轉攻細細粒、容易炒的車位。去年一手及二手住宅車位成交金額,合共超過一百六十六億。

  事實上,車位炒風可說席捲全城。深井的豪景花園便是大小炒家其中一個「樂園」。根據中原地產研究部資料,去年豪景花園車位的買賣登記有三百三十九宗,涉及金額達四億五千七百萬元,是全港車位成交量第二高的屋苑。該場車位成交價大約為八十萬至九十萬元,最高成交價曾炒至一百二十八萬元。

  據區內經紀透露,豪景其中一位「大業主」,是家住天水圍、行內稱為「車位靚太」的湯太。《東周刊》翻查土地註冊處紀錄,她仍持有至少三十四個車位,全部都是去年摸頂掃入。按近日市場成交計算,她幾乎全部「坐艇」。

  面對車位市況不佳,她直言只好收租「坐貨」。「唔驚喎,用嚟收租囉。只要有實力,揸到最後就會贏!好似買樓,當年嘉湖夠跌到唔使一百萬,o依家要六百幾萬,守得到咪得!經濟差啫,未差到要賣車,變成經濟大衰退就驚!」

  她曾經一年內掃入近百個車位,每個賺四萬至十萬元就沽出,十個月帳面便賺了近四百萬。「最緊要唔蝕。o依家可以守一陣,最近習近平同特朗普傾嘢,好多人觀望,應該好快傾完。車位供應只會愈來愈少,爛地停車場又無晒。聰明嘅車主唔會泊街等抄牌,梗係泊車場。」

  其實全城每次颳起炒風狂潮,往往最後衝入場的都是「老散」。本港老牌家族廖創興第三代成員、正八集團主席廖偉麟早年已大手掃入車位投資。如今不少屋苑車位的成交價拾級而下,有「車位大王」之稱的他直言炒風已不再「熱烘烘」。

老牌家族成員持貨放租

  現時廖偉麟的家族紀惠集團仍持有近二百個車位,全部在核心地區,用作長線收租。他認為獨立車位很難再炒得起,自己亦只會考慮可一次過大手掃貨的項目。

  「至少三百至五百個先考慮,量多先有折扣。現在領展都唔拆車場,要搵獨立車場或者大集團。大批車位多數與商場同時出售,咁就要睇商場位置同車位配套,防守性要強。總之獨立車位我唔會建議投資。」

 林一鳴:料下跌兩三成

  現在樓市開始下調,曾投資車位的資深投資者林一鳴估計投資者會先放售車位,所以車位會比樓市跌得更多。今年整體車位價格和租值起碼下跌兩至三成。「轉買車位投資嘅人多咗,回報率就一直跌到兩厘,投資價值唔再吸引。至於去年接咗火棒嘅人,要睇租金回報率考慮止唔止蝕。如果有三厘或以上可以揸住,就當買貴咗。」


hd