非一般的教育體驗

  藝術教育向來是一門高深的學問,尤其要深入淺出、且不忘互動,更是難事。但筆者早幾天趁着西九文化區戲曲中心正式開台,特意參加了它為公眾提供的各種教育活動,當中充滿互動,令人印象深刻。

  先講戲曲中心的導賞團,可以說是「謎底團」,因為好多問題都會在導賞團搵到答案。就好似點解去茶館睇戲,山頂飛會貴過第一排,而且更加搶手?又點解粵劇演員無論幾時都會講早晨?導賞員就會在一小時內,用上多媒體素材,由演員的唱唸做打、四大行當、化妝服飾,講到舞台上的一桌兩椅,深入淺出令觀眾明白戲曲文化以及空間設計如何配合戲曲需要。

  觀眾更可以參加戲曲中心定期舉辦的工作坊,除了可以親身嘗試學習各種戲曲身段之外,參加者還可以自己製作演出道具,啱晒一眾學生哥。工作坊融合了中國和香港非物質文化遺產和傳統戲劇元素,以另一角度及方式為藝術愛好者提供互動實踐體驗。

  如果要深入認識戲曲這回事,當然少不了專業的講座。但講座並不是一味玩高深,而是知識與趣味並重,不止有分享,更有現場示範,就算你只是戲曲初哥,都一樣會在90分鐘的講座入面,聽得津津有味。

  如果你是中學生,更有專屬教育專場,有得睇演出、又有即場解說及互動環節呢!文︰Art PaPa 圖︰西九文化區管理局

hd