新星鄧月平望30歲前圓置業夢 向恩師「阿旦」學演戲

        新進女星鄧月平(Larine),最近因在「阿旦」鄭丹瑞執導的一套電影中演繹出色、而大獲好評,原來她早於18歲便問家人借錢投資高風險產品,投資策略十分進取及大膽,現正積極儲錢,一步步走向30歲前置業的目標。對於事業發展大計,這位九十後少女亦滿肚密圈,希望可以在演戲方面打好基礎。記者:羅其軍 攝影:伍炳輝

        近年樓價「只升不跌」,年輕人置業往往遇到不少困難,身為九十後的Larine 坦言:「自己同唔少年輕人都有同感,覺得現時樓價過高,難以置業,但會一步一步完成置業夢,所以現時努力儲錢。」

每月儲七成收入

  對於儲錢經驗,Larine 笑言「自從出嚟社會做嘢之後,每個月都會將7成人工俾媽咪儲起,如同成立一個『置業基金』,而自己就用3成,當然錢少咗,買任何嘢之前都會計過、去幾間唔同嘅鋪頭格價,以防自己使大咗。」

  Larine 的個人投資經歷絕不失禮,早於18歲那年便問媽咪借錢投資,坦言「自己喺投資方面都好進取、好大膽。」

  她透露「踏入18歲就問媽咪借達6位數字嘅金額去投資衍生性產品,初期嗰時好內疚,驚蝕晒媽咪嘅錢,擔心到晚晚都瞓唔着;唔知喺咪天生好命,到第8個月個時已經開始回本,同有錢賺,而未來亦會投資其他產品。」

進取投資得利

  談及未來置業想法,Larine笑言:「買樓是每一個人嘅夢想,希望以30歲前置業為目標,即使將來『冇人要』,嫁唔出都有間姑婆屋揸手,可以同屋企人過埋下半世,所以要努力儲錢。」

  至於首選置業地區,她並不會選擇山頂及南區傳統豪宅地段,反而鍾情市區熱鬧的生活,尤其心儀大圍及沙田一帶村屋,因她曾於該區居住,認為兩區交通便利,美食眾多。

  樓價高企,Larine 慨歎,「覺得好可悲,讀書時學校就鼓勵你去追夢,但出到社會工作,就不得不向現實低頭,現實同理想有好大差距,即使自己啱啱踏足社會,喺心態上都會有好大轉變。而香港每月工資中位數都唔低,甚至高過好多國家,但好多港人都買唔起樓,到底邊一方面出咗問題?而居住權喺我地與生俱來嘅權利,希望政府可以協助普羅大眾置業。」

盼政府施緩手

  對於部份年輕人,在畢業後均希望能夠盡快置業,有自己的安樂窩,她則認為,「畢業後應該先規劃人生目標,問下自己有咩興趣等,好好諗清楚自己嘅方向,若認為買樓計劃喺『人生藍圖』之內,就應該一步步咁去實踐,唔可以操之過急。」

  問及心目中最理想的居住國家,她則首選泰國:「心儀泰國生活的節奏較慢,美食眾多,樓價相對香港嚟講較便宜,可以隨時行街購物。」

場地提供:

Spasso Italian Bar & Restaurant

hd