頭號目標——福多寶今仗突破

  賽前度馬,無可避免一定要預測步速形勢,不過今季一再出現一種奇怪現象,就是多快馬時會開出慢步速,但似是無領放馬時,最終卻出現極快步速。既然如此,今次就試一試逆向思維。

  第五場四班一八○○米。全組只有「陽光」和「放馬過來」有放頭往績,但無論兩駒中由哪一匹放,步速都不會快,照理後上馬會頗蝕形勢。不過今次就係博有馬搞事拉快步速。

  「福多寶」自上季尾插班後只跑過四仗,雖然上季初出跑千四米即接近,難度不低,不過因為今季早期工夫不完整,所以季內兩仗都是大冷門。其中上仗在447場次角逐四班千六米,在步速前慢後偏快之下,直路要在馬林中取位,在鏡頭側鏡所見,要到最後幾十米才追勢較勁,似是較遲才撻着。然而,若看直鏡,當可發現其實直路上的大部分途程,其前方一邊有馬干擾,另一邊則鞭影重重,其實要到終點前才有較好的視野,亦即是在側鏡見到牠追勢較好一段,其實才是真正可望空。

  兩線血統都有長力之馬,熱身兩仗後理應有進冇退,何澤堯操過同場的「陽光」而最終揀騎此匹上仗座騎,未必無因。若臨場真的出現出乎意料的步速形勢,有能力的四歲馬有望取得突破。

仲達

hd