年年廿五歲的譚詠麟(校長)即將於4月推出全新國語大碟,新碟共收錄10首歌曲,邀請不同的歌手合唱,陣容強勁,包括:陳奕迅(Eason)、孫楠、五月天、陳潔儀、李幸倪(Gin Lee)5位不同地區的歌手。

近日校長與Eason合唱的《明天何其多》,以及與Gin Lee合唱的《型人道》已經拍晒MV出埋街,雖則歌手份量十足,不過反應似乎唔多掂,仲有網民提議校長可以養尊處優,唔使咁多搞作。

講講首歌先,校長與Gin Lee在MV中騷舞技,成個MV畫面調成紫色,有網民指十足「嘟姐」鄭裕玲跳招牌「鈣質舞」。校長入行多年,舞技有返咁上下,可惜被指「老土過80年代」、「好似兩父女唱歌」,亦有mean爆網民留言「MV變咗Gin Lee黑歷史」,好衰吖。

另一首歌,校長孖埋Eason合唱,天王級的演繹,實係品質保證。點知網民又批評校長的國語水平認真麻麻、有啲難頂,負評多多。