基於土地問題,香港人「上車」難,為儲首期日捱夜捱,買到層樓又要做樓奴。當做業主成為夢想時,又可以去到幾盡?TVB真人騷《有樓萬事足》下周一播出,未出街已經做咗城中熱話,皆因22歲港女Seasun語出驚人,「冇樓唔好白撞」、「有樓有高潮」,喺網上平台洗晒板。現今香港地,冇父幹冇橫財,又冇叠水老公、男友,可能要死慳死抵先買到樓。

繼離地Seasun後,有份做真人騷的23歲文員Macy,「靠自己」儲首期,好勵志咁喎,買樓不是夢?Macy滿臉驕傲的神情,分享如何每月儲105%,以3百多萬喺旺角買咗個細單位。Macy自言:「第一樣嘢,善用身邊資源,八達通係屋企人支持我,lunch同朋友食飯用八達通嘟,嗰筆錢咪轉交咗畀屋企人。」食屋企住屋企,拍拖男友畀錢,日日炒股唔畀家用,連Macy媽都投訴:「唔開心㗎我,你做嘢都冇家用畀我,咁自私。」Macy即理直氣壯咁話:「我自己慳得好辛苦好辛苦,我覺得你應該畀啲鼓勵或者支持我!」

「自食其力」買樓例子似乎走火入魔,靠自己一樣唔受網民認同,負評一地都係。有網民插爆Macy好自私:「問題在於佢竟然覺得咁儲錢係無問題,甚至覺得自己好叻。佢無為屋企付出過,佢阿媽係覺得佢自私,仲講到自己好慘咁,不知所謂。」同時有人嘆謂「今時今日嘅香港人,為上車黐晒線」、「做佢阿媽、朋友、男朋友好慘」、「係身邊人助養佢」。