九巴車禍司機懷疑事前與乘客發生糾紛,教訓歷歷在目。社交網站又流傳一段片段,一名巴士男乘客懷疑不滿巴士上層無開冷氣,到司機位旁邊拿出手機拍攝司機,司機不滿被滋擾於是在停在路中罷駛。但男乘客仍不肯罷休,斥責司機不肯開車,最終司機致電向總部求援。

從片段所見,一名巴士男乘客懷疑在荃灣青山公路一輛九巴上,用手機拍攝司機,司機隨即停車。乘客質問司機:「你做咩唔行車?」巴士司機即答:「因為你用手機騷擾我囉」,乘客反駁:「我點騷擾你啫?」,司機再問「你擺部手機喺度做咩嘢啫?」。

男乘客指摘司機:「我唔擺部手機,你頭先又唔行車。你依家又唔行車,點解啫,我話畀你聽無開冷氣,你話你有。」司機解釋:「我真係有開冷氣㗎。」男乘客叫司機到上層親身測試:「你行上去,如果你摸到有一滴風,我批咗個頭落嚟畀你好無」。

司機保持沉默,男乘客再質問為何不開車,「你依家做咩唔行車啊請問你?我無騷擾你啊,你行你嘅車,我唔會同你講嘢,你行啦!」司機拒絕開走並示意後面車輛扒頭。

司機拿出一本簿和使用手機。男乘客一再問:「你做咩停係路中心度唔行車啊先生?」司機繼續使用手機,斥責乘客:「唔好影我嘅私隱啊,我話畀你聽啊!你影啊你繼續影啊!我依家報台,你唔使騷擾我。」最後乘客否認騷擾,司機宣稱「我好驚喎!」,乘客於是揚言「你好驚?驚咪暈低囉」。

網民紛紛指責乘客騷擾司機,「有冷氣又話凍無又話熱」,「唔關司機事,司機無得較冷氣」、「車長只有辦法開關」。