江蘇文化源遠流長,由全國政協常委唐英年擔任會長的香港江蘇社團總會,本月20日至22日在維園舉行「水韻江蘇.相約香港」江蘇文化嘉年華,主打江蘇美食及文藝演出。江蘇社團昨舉行記者會宣傳,平時識飲識食的唐唐親自落場,夥拍籍貫江蘇南京的TVB藝人高海寧(高Ling)齊齊下廚,示範包餛飩及地道江蘇點心。

唐唐笑言以往好少自己落手包餛飩,「平時都係幫手食多」,但現場所見,唐唐手勢純熟,有板有眼,手中餛飩形狀似足一個金元寶。高Ling就話,曾與外婆在南京生活十幾年,經常食外婆親手整嘅餛飩,好味之餘仲有一份愛意喺裏面。

江蘇社團今次同江蘇省人民政府、江蘇旅港同鄉聯合會合辦嘉年華,活動分成4部分,包括推廣江蘇美食、「老字號」特產、非物質文化遺產及江蘇特色文藝演出,其中江蘇美食有50多款,盧駿在現場試過江蘇名菜薺菜糰子、三丁包,確係好味。活動亦展現當地文化技藝傳承,包括金陵剪紙、蘇繡、留青竹刻等,市民可即場學習製作。

唐唐透露今次活動花費數百萬元,是首年試辦,讓市民免費入場。嘉年華每日開放時間不同,20日晚上7點開幕,至10點,21日就朝10晚10,最後一日則是朝10晚6。