流感高峰期公院逼爆病人,可惜仍有人對醫護人員指罵。資料圖片
流感高峰期公院逼爆病人,可惜仍有人對醫護人員指罵。資料圖片

本港正值冬季流感高峰期,公立醫院每日逼爆病人,幾乎全部公院內科病房已告飽和。有公立醫院男護士在網上慨嘆「心好累」,表示隨著病人愈來愈多,醫護人員工作負擔亦愈重,而有病人不僅沒有體諒,還大發脾氣,甚至寫投訴書。

據Facebook專頁「小毒男護士」貼文,日前他處理3宗出院個案時均受到病人指罵,當中一宗個案的事主還寄投訴書。一名男病人的妻子正值巡房時間接丈夫出院,加上醫院太忙,故未準備好出院文件。病人妻子一面鄙視,還一直指罵醫生護士稱「點解唔由話出院嗰刻開始就準備好所有文件,害佢要等咁耐」

貼文還表示,事後更收到該個案的投訴書:「完全不明白為何要等那麼久!為何不一早準備好出院文件!難道要等到最後一刻才做嗎?浪費時間!」負責同事固然身心俱疲,其他同事也一樣非常灰心,還稱所有醫護人員已盡心盡力幫病人,並不奢求他們會感謝,但結果反被指罵,只好慨嘆一句「心好累」。


小毒男護士貼文全文如下:

《心累了》
一年一度嘅流感高峰期又到
隨住病人數目越來越多
醫護人員嘅工作負擔亦越來越重
可悲嘅係
同一時間病人對醫護人員嘅怨念都越來越深

今日單係處理三個出院CASE已經消磨咗好多意志

——————————————————-
Case1, 一個有精神病史嘅婆婆
因為出院時發現佢手上嘅藥唔夠食到下一次覆診
所以需要醫生再幫佢重新出藥紙, 確保婆婆出院後有藥食
但醫生人手實在太不足, 要跟巡房,book緊急scan,大量收症病人, 海量鎖碎事等等
所以看似簡單嘅出藥紙都已經用咗唔少時間
出完藥紙又要等NEATS(非緊急十字車)送婆婆返屋企
等到有車, 又到porter (負責運送病人)人手唔夠
中途婆婆已經不斷指住護士鬧, 想打人,想逃走
幾經多次勸告先肯乖乖地等到一切準備就緒

Case2, 一個做完手術後出院嘅女士
出院文件已經準備好, 只欠幫病人拎藥
但藥房多人到好似街市咁, 幾十至一百人等拎藥
即使幫病人chop咗緊急印都要等接近一個鐘
女士家屬就對住護士出氣
「入院已經等10個鐘, 依家出院又要等咁耐, X!」
同佢解釋:「無辦法呀出院病人多, 藥房都要時間準備, 防止出錯」
「開多幾個櫃臺囉!」
呢句真係是日金句, 我好想同佢講就算開多一萬個櫃臺, 都唔會變到一萬個藥劑師出黎
結果就一直比說話我哋聽直到出院

Case3, 一個有個西口西臉老婆嘅男病人
同樣都係因為醫生太忙嘅原因
加上撞正巡房時間,所以未準備好出院文件
病人老婆就一直鬧醫生護士點解唔由話出院嗰刻開始就準備好所有文件,害佢要等咁耐
仲要邊講邊反白眼, 一臉鄙視咁
第一全醫院唔係得你一個出院
第二醫生係需要做咗緊急野先
唔通另一個病人嘔緊血仲要幫你做咗出院文件先?
當然我明白佢地未必清楚醫院嘅運作, 而且等咁耐的確好燥底
所以我見到醫生有一刻空閒,已經狗衝去叫佢幫手處理咗先

——————————————————-
搞完呢3個case
負責嘅同事已經身心俱疲

然後我哋收到case3嘅投訴書:
「完全不明白為何要等那麼久!為何不一早準備好出院文件!難道要等到最後一刻才做嗎?浪費時間!」
所有同事睇到都無出聲
其實我相信大家都同我一樣好嬲好灰心

唔單止醫生護士, 其他如上述嘅NEATS,porter,藥劑師以及其他專職人士其實都好盡心盡力幫病人
已經唔奢求佢哋會多謝我哋
但結果反而得到佢哋嘅指罵, 仲要無得話返佢哋 (話佢哋又話你無醫德無愛心)
嗰一刻真係覺得心好累😔

有醫護人員在網上大吐苦水。小毒男護士facebook
有醫護人員在網上大吐苦水。小毒男護士facebook
有醫護人員在網上大吐苦水。小毒男護士facebook
有醫護人員在網上大吐苦水。小毒男護士facebook

此個案事主不但責罵,事後還寫投訴書。小毒男護士facebook
此個案事主不但責罵,事後還寫投訴書。小毒男護士facebook