僱主強調係外傭都想去旅行,唔想一個人留係屋企。
僱主強調係外傭都想去旅行,唔想一個人留係屋企。

問有請外傭嘅朋友一個問題,若果你計劃全家去旅行,會唔會帶外傭?或者有人會,有人唔會,但如果會大家又會點做?

對於呢個問題,有一位僱主就係Facebook群組「外傭僱主必看新聞訊息」出po問,佢話正計劃緊全家去旅行,兩個小朋友都大個,一個21歲、一個11歲,唔使外傭姐姐照顧。佢話之前都有叫過姐姐一齊去北京旅行,當時住五星級酒店都係全包,但因為今次兩個仔都大個,就唔使佢照顧,所以就問大家,今次旅行好唔好叫姐姐夾返錢,而佢計過條數,話機票連同酒店,人均4000元,如果連同飲食同門票,應該每人6000元。

佢又話,今次係「齋玩」,唔使湊小朋友,毋須工作,雖然佢都有強調話「無諗住叫佢畀錢」,而且又話姐姐稱唔想一個人係屋企,所以都想去,所以問網民「慣常做法…會唔會叫佢畀返少少錢」。

對於呢個問題,網民一面倒認為唔應該要姐姐夾錢,仲反問返樓主「你老細叫你出trip,但要你自己畀部份錢,你有咩感覺?」,仲話「第一次聽要收工人錢」;亦有網民話要俾返出差錢工人「去到都係幫你做工人咋哦,應該收返出差費就真呀」,而樓主就回覆網民留言,強調姐姐係自願想去,有網民更直斥「唔好講到咁偉大,好似益人去」,有網民問「咁你坦白問下佢自費去唔去?」。

僱主網上發文求助。網上圖片
僱主網上發文求助。網上圖片