吳蕙芳被封為「金句王」 。
吳蕙芳被封為「金句王」 。

法官在維護公義時要平衡「法」同「情」,實在不易做!其中一位主任裁判官吳蕙芳,近日就被網民封為「金句王」,全因吳官在判案時,時不時都會展現金句,令人回味無窮。Kelly就為大家整理多個吳官審案時的金句,重溫其妙語連珠!

●刁民搞搞震
一名持單程證來港的女子因其10歲兒子耳痛,遂到廣華醫院急症室求診,期間因等候甚久未獲治理,要求當值女護士讓兒子優先治療,被拒後一怒下用袋襲擊女護士頭部及頸部。吳官斥責被告,「(護士)已經忙到一頭煙,仲要遇着啲刁民搞搞震!」、「眼淚是沒有同情分的」、「去救人嘅地方撒賴?添煩添亂,法庭絕不容許及絕不會放過,呢個訊息要傳出去」。

●佢試吓自己個女、老婆被人非禮,佢揼死人𠻹
七旬翁在土瓜灣海心公園涼亭內,對一名患有唐氏綜合症、只有中等智商的女子大肆非禮,吳官怒斥被告「下流、賤格」,辯方求情時,吳官更反問「佢試吓自己個女、老婆被人非禮,佢揼死人𠻹!」

●你囂張跋扈,有辱國家給你的寄望
一名投資移民內地漢到酒店鬧事,更打傷保安,被控一項普通襲擊,吳官用普通話問被告:「你是國家批准移居香港的,你囂張跋扈,有辱國家給你的寄望,丢臉嗎?」。吳官續稱「既然你是香港居民,應該好好提高自己的修養。你現在是香港人,我們非常歡迎,但不要將香港人面子丢光。」更著他既然身為3名子女之父,要以身作則教育下一代。

●你再做呢啲嘢,我一定捉你去睇吓係咪傻嘅
71歲老婦因不滿住所管業處一名經理工作態度及管理手法,兩天內打電話投訴逾800次,管理員每1至2秒便接到電話,吳官訓斥:「妳係咪有問題呀?精神有冇病呀?打800幾次電話俾人?咁無聊嘅你,你再做呢啲嘢,我一定捉你去睇吓係咪傻嘅。」

●你唔再愛佢唔緊要,你唔好蝦佢
與夫相差18年的42歲內地新移民婦人,因晾衫和家務問題與夫爭執,持菜刀背打傷60歲丈夫,吳官慨歎本案「係好多中港婚姻嘅悲劇」,並提醒女被告:「你唔再愛佢唔緊要,你唔好蝦佢,起碼佢畀你嚟到香港,搵到更好嘅未來,你唔愛佢,可以申請離婚,唔好造成家庭悲劇」。控方庭上稱男事主不想追究事件,故控方以簽保守行為方式處理本案,吳官即指,「一把生果刀,一把菜刀喎,案情極之嚴重,點解妳老公肯畀你簽保,或者念在子女或夫妻情分上,既然你丈夫都唔願意舉證,法庭乃批准妳簽保」。

●自己國家製造的奶粉,連自己都唔敢食,係咪可悲?
吳官曾於2015年一個早上處理23宗涉及違反限奶令的案件,期間她多次爆出金句訓示各被告「自己國家製造的奶粉,連自己都唔敢食,係咪可悲?這情況是國恥!」、「老當益壯,運咁多奶粉,一定都可以承受牢獄之苦。」、「(走私奶粉)真係會判監,千祈唔好以身試法!」、「希望犯罪集團積陰德,唔好咁冇陰公送老人家坐監。」。

●讀咁多書都係廢嘅
23歲法律學士因女友提出分手後,爭執之中把她推倒及扯她頭髮,更把她的電話掟爛,被控襲擊致造成身體傷害及刑事損壞。吳官斥被告「唔好以為可以借酒行凶或者發酒癲」又指「醉酒有三分醒」,「讀咁多書都係廢嘅,人品同教育唔成正比!格衰!」她更苦口婆心地說:「呀仔,唔好同我錯兩次」。

●打人十幾巴,劈里啪啦
一對失婚男女相戀並共賦同居後,於所住的亞皆老街住所內的一年多期間,襲擊女方的十歲女兒。母親承認曾用衣架、「不求人」、晾衫棍、藤條打她並咬她,其男友亦承認掌摑該女兒十多巴。期間男被告聲稱當女方女兒為親生女兒看待,吳官即斥「當親生女,打人十幾巴,劈里啪啦」。

●嗰三個係你親生子女,你反而唔照顧,去照顧個成年女人
一名單親父親留下100元予3名9歲至14歲的子女,自己上深圳照顧發燒的女友數天,被控疏忽照顧兒童罪。吳官怒斥他謂:「嗰三個係你親生子女,你反而唔照顧,去照顧個成年女人?你以為100蚊就夠3個人食?」期間辯方代表律師指,被告曾與大女兒聯絡,著她試找朋友借錢,吳官即反駁:「細路仔邊有通財之義嘅朋友?大人都未必有啦。」

●智障唔係大晒
輕度智障19青年在黃大仙非禮女途人,過去曾有12次同類案底,吳官直指「智障唔係大晒」,其他智障人士也懂守法,直斥他「根本係色情狂」。吳官又指他無業不找工作,「游手好閒,咪胡思亂想諗吓點摸女人囉」、「人哋可唔可以見到邊個樣衰就揼邊個呀?人哋覺得睇你唔順眼,可唔可以揼你呀?唔得呀嘛!」 ,又叫他反思「人哋可唔可以摸你阿媽、家姐細妹呀?」

●無可能嘅嘢唔好要求
任打鼓導師34歲男子,與一名網上認識的13歲女童發生性行為,吳官斥被告「成熟到可以控制自己,但你無!」、「搞人哋唔帶套,又係你撩個女仔上床」,判刑前亦明言判監是事在必行,「無可能嘅嘢唔好要求,只能夠係刑期長短」。