3位候選人今晚喺由選委舉行嘅「特首選舉論壇」上刀槍劍影,其中候選人林鄭月娥評價曾俊華過往的工作表現時,稱對方「枱頭無File、無紙張,好乾淨」,自己就好羨慕,自己就工作忙碌有好多文件要處理,語帶諷刺。任職記者時專跑中國新聞嘅高教界選委呂秉權即時在其facebook專頁,上載咗一張國家主席習近平辦公枱面嘅相,稱「國家主席習近平的案頭也是非常整潔,甚至是無紙的,這是因為辦事效率高,不讓文件堆積。」

呂秉權又提到,中央辦公廳主任栗戰書曾經講過,「習近平總書記要求我們幹工作要案無積卷、事不過夜。總書記自己也是這麽做的」,反問「林鄭點評價習主席張枱呢?」

除咗呂秉權,胡國興嘅facebook專頁亦分享咗自己一張舊照,同樣見到胡官枱面,話「我枱面都幾企理,明哥飯盒就有幾個。」網民都搵咗好多「老闆」級枱面,包括長和主席李嘉誠、美國前任總統奧巴馬,枱面都係咁乾淨!誠哥之前受訪時,仲話自己喜歡「今日事,今日畢,桌上不留紙」。

剛才嘅論壇上,有選委要求林鄭同曾俊華互相評論對方有咩可取之處,林鄭就話過去任發展局局長時,係曾俊華下屬,每次入去佢辦公室「都好羡慕,枱頭無File、無紙張」,仲話自己「呢樣做唔到」,自己有大量文件要處理。不過,曾俊華就話林鄭可能唔了解佢做事方法,強調「唔單止要work hard,仲要work smart」,如果一個人能夠做所有事,只會係一個好「伙記」,而唔係好領袖。