張敬軒除夕夜舉行第7場紅館騷,邀請七仙羽做壓軸嘉賓,獲全場核爆式歡呼。軒仔笑說︰「大家見到我未婚妻咁開心。」七師傅即回話:「吓?我哋乜都未做過喎,咪好唔抵……囉。」軒仔則表示︰「你又講得啱,但係我好保守,有啲嘢,我要結咗婚先做。你今日綵排叫我咩話?你記唔記得?」七師傅答︰「老公……唔係……軒公」,令軒仔笑到彎晒身。七師傅又拖住軒仔手問︰ 「你隻手咁凍,你係咪嚇親?做足18場,日日咁唱真係好辛苦。」軒仔就好識做表示︰「你帶溫暖畀我咪得囉,你有咩秘方教我補下身?」七師傅竟然回答,「下一世唔好做歌星啦,太辛苦啦!做國王算啦你。」軒仔則爆笑反問︰「吓?國王後宮佳麗三千,我個腎點搞?」七師傅繼續淡定回答:「你剩係獨愛一個人咪得囉!」笑到大家標眼淚。
![七仙羽做壓軸嘉賓,與張敬軒拖住手仔出場。](https://image.hkhl.hk/f/1024p0/0x0/100/none/c0c740bd2059cf45e17667aeff805eff/2022-01/2_3.jpg)
七仙羽做壓軸嘉賓,與張敬軒拖住手仔出場。
![互派心心甜到漏。](https://image.hkhl.hk/f/1024p0/0x0/100/none/d0709c6c9ea0170a4cd11c4997597cbc/2022-01/3_2.jpg)
互派心心甜到漏。
當觀眾起哄叫軒仔「咀佢」時,七師傅則搶答:「我ok㗎!」隨後軒仔用疫情來推卻,豈料七師傅窮追不捨,最後在全場歡呼下,軒仔盛情難卻咀了對方臉頰,當然七師傅亦禮貌地「回咀」,軒仔就笑言今年得到七師傅嘴唇加持,一定好運過人,不如請師傅再加指點甚麼方位適合他?七師傅回答︰ 「我計過你條命啦,西面最適合你,你一路向西啦!成個紅館都係西面,我畀個錦囊你,你帶睡袋行李搬來紅館住啦。」又突然叫人拿出一個垃圾膠袋:「我本來想送層樓畀你,但又驚爆緋聞,啲人話我包養你,所以我用好長時間,自己親手做份禮物畀你,個垃圾袋係因為出來太趕啫。」接着由垃圾袋中拿出一個能量塔,望對方日日開心!
![老闆楊受成到來捧場,並在後台大讚軒仔演出成功,互相擁抱祝賀新年。](https://image.hkhl.hk/f/1024p0/0x0/100/none/9632ef2c1d28338b8924c1628b0e0992/2022-01/90a6c467-47a2-4a32-a4f4-bbd8875e88b3.jpg)
老闆楊受成到來捧場,並在後台大讚軒仔演出成功,互相擁抱祝賀新年。