譚俊彥（Shaun）出道21年，早年集中影圈及內地發展，雖然勤力密密做，不過成績與知名度始終一般。現年41歲的他成家後專注留港發展，安頓一家四口之餘，繼續瞓身搏殺！近年終於在TVB冒起，在TVB六年間曾兩次提名「最佳男主角」，今年憑《換命真相》亮眼演出殺入視帝五強，近月分別演出飲食競賽節目，又頻上綜藝獻技，在TVB台慶更擔大旗演出，明顯備受公司力捧，加上有韓劇《魷魚遊戲》效應，單是激似男神李政宰已為譚俊彥帶挈人氣勁升，可謂天時地利人和都齊，在高唱入雲的呼聲中自然成為封帝的大熱人馬。
鄭嘉穎力撐稱帝
今年「視帝」競爭激烈，贏面勝算必定熱捧《換命真相》的「時光」及《星空下的仁醫》「鬍鬚醫生許甘楓」，同劇馬國明亦加入戰團，不過向來佛系的馬明則保持平常心，志不在獎。嘉穎曾透露「鬍鬚醫生」大受歡迎，帶挈他人生第一次免費搭的士，又揚言現在演戲不是為獎項，認為應該頒給未曾得過獎的人，像張振朗及譚俊彥付出很多努力，獎項可以改變他們一生。不過TVB晚上正重播嘉穎主演的《怒火街頭》系列劇集，似為他造勢爭做三冠視帝，可視為黑馬。
張振朗則憑《拳王》打入五強，他為角色刻苦操練，變身大隻佬，下過不少苦功，賽前曾一度捧成大熱，奈何劇集播出後未似預期爆出，劇集結局收視更成績一般，直接令氣勢和贏面減弱！而陳展鵬主演《逆天奇案》則擺明陪跑，看低一線。
把握《魷魚》效應
視帝激戰即將揭幕，譚俊彥承認開頭好緊張，出了十強名單才緩和下來，投票截止日在TVB盆菜宴上收到各方同事祝福，還轉發截圖指已投他一票，令他增加自信。今年譚俊彥不單劇集創佳績，同時被發掘多才能一面，包括歌舞及廚藝，顯出暖男一面，他說：「成日都話天時地利人和，在TVB第一個角色係劇集《天命》，咁啱要搵角色而我又簽了公司。拍《換命真相》時好辛苦，疫情第一套劇開始，我哋要戴口罩，遇上唔少障礙，加埋中間又客串《拳王》，就好似突然畀好多嘢你，你選擇做定唔做呢？再加埋網絡反應大家也估唔到，無端端有個《魷魚遊戲》，大家覺得我好似樣，我成日都話『似咗好多年！』拍緊《失憶24小時》，湯洛雯睇完李生（李政宰）的戲，直頭同我講韓文，話我真係好似，我話係喇，知喇，拍戲啦，冇諗過全街人反應會咁，好好彩《換命》決定做台慶劇時，街上未有呢個反應，出咗街後熱話就來，帶挈多了人找我工作，好想用《魷魚》兩字同我去玩，要自己把握機會。」直言受惠不少。
集合家庭力量拉票
譚俊彥博到盡在幕前獻出多個第一次，廚藝了得的他，近月才被公開「暖男」身分，先後參與飲食節目《煮戰》及《男神廚房》，拍前者時要與李家鼎和陳煒合作，亦是他首次參與煮食領域，直言當時好驚，又受鼎爺氣場影響，緊張到手震，接住就拍攝《男》節目，憑實力稱冠，一切開始很順利。演戲加廚藝還不夠，在台慶夜譚俊彥帶領演手舞，又於慈善節目《歡樂滿東華2021》中與朱晨麗玩火跳舞，他笑說：「綵排時場務話我好唔掂，我真係驚，20年來第一次跳舞。」經過一步步鋪排下來，如今拉票完畢，讓譚俊彥鬆一口氣等待派發成績表，他強調入到十強，心已舒服好多，直認以前輸在少出聲，今年有集合家庭力量拉票，「無論結果點我都盡晒力。」經歷今年拉票後，譚俊彥有所體會，他沒想過世界各地fan club真的會投他一票，因為過往他一直收埋自己，很少與fans聚會，疫情前他曾到星馬工作，建立一定粉絲，令他最驚喜連越南也有fans，「我曾經去為劇集《包青天》、《特技人》宣傳，佢哋唔係好有錢，對我表達係畫畫或親手製作小禮物，對我來講係好大支持，好多謝佢哋。」
渴望得獎多年
譚俊彥今年成稱帝大熱，問到盼望得獎嗎？他一臉認真說：「盼望好多年，可能唔係呢個獎，由出道時新人、電影獎項，但咁多年都冇試過，提名都冇咩！今年能入到最尾階段，我覺得係有進步。」若得獎會否落淚或第一位會多謝誰？他說：「我每日都有諗吓，但諗定冇用，相信到時會一片空白，就似我當日拉票，我諗定晒，但上到台又變了另一樣嘢，可能前面個人講咗你想講說話，又或係咪唔應該咁講呢？真係要到時先知，不過坐喺台下就會心卜卜跳，同緊張。」
馬國明啟發思路
賽前幾位視帝人選均謙虛禮讓，互相睇好大家，譚俊彥指今年會幫返自己先，適逢天時地利人和很難得，會為自己加油，小朋友又開始長大，支出愈來愈多，若有獎會有大改變，「馬國明好好，鼓勵我加油，攞完獎永遠係視帝級，有個級數，工作會唔同，我聽完之後對自己思路都改變了。」提到家庭及一對寶貝子女，譚俊彥總是一臉溫情，並透露子女曾看他的作品見爸爸被打即爆喊，女兒漸長則開始明白事理，「同學仔會問佢爸爸好似《魷魚》個主角，囡囡會話有啲似，但唔係我daddy 。」
今年賽制刺激，先公布十強再進入最後五強，譚俊彥感到好刺激要驚很多次，並說：「志偉哥（曾志偉）返來後想革新，今年大家好有團結氣氛，之前疫情，難聚埋一齊，今年又有生力軍《聲夢》，令公司景象好有朝氣。」
原文刊於《星島日報》名人雜誌（逢周日見報）
