本港已進入第5波疫情，而喺英國，單日新增病例突破21萬，居於蘇格蘭嘅喬寶寶按專家意見，全家已補打第3針，原先寶寶諗住趁疫情緩和時去大馬搵吓外快，𠵱家因為好多國家禁止由英國入境人士，賺錢被逼煞停；至於喺曼城嘅林子博反而冇初嚟報到時咁驚青，仲趁聖誕新年長假帶子女去玩。採訪：方騫平
疫情下喬寶寶賀妹妹個細仔牛一，只能搞小型派對。
子博平日同子女去做運動消閒。
經常追住疫情走嘅喬寶寶見慣「大場面」，所以輕鬆面對英國Omicron迅速蔓延，選擇同病毒共存！他淡淡然說：「變種病毒Omicron感染力強，但殺傷力低，相比之前嘅病毒，蘇格蘭入院人數係少咗，不過，專家話以𠵱家咁嘅走勢，預測未來接近一半嘅人容易感染到，倫敦成為重災區，其次係伯明翰及曼城，因為18歲至30歲嘅年輕人唔鍾意戴口罩，蘇格蘭啲人會乖啲。」
喬寶寶、喬嫂嫂出入如臨大敵做好防疫。
子博一家三口趁長假去咗伯明翰。
寶寶最擔心家中老弱
喬寶寶家中有老有嫰，最擔心80歲嘅媽媽，同埋多病痛嘅細仔，又怕孫仔BB容易受感染。他無奈道：「見步行步囉，出唔到去做嘢，等疫情好啲去吓旅行囉，𠵱家以家庭樂為主。」至於林子博喺英國生活咗半年，見到冇乜人戴口罩經已習以為常：「佢哋自律性唔夠，又祟尚自由。不過，𠵱家有啲商場會自行叫市民強制性戴口罩，所以發現多咗人戴口罩，反而冇以前咁擔心，其實都擔心唔到咁多，只能做好自己。」首次喺英國過聖誕節，子博同仔女去咗伯明翰、利物浦、黑池。另外，既然有咁多人關注英國疫情，他有意拉埋朋友拍片做街訪，了解吓當地人對疫情睇法及心態。
喬寶寶個孫仔超得意，難怪𠵱家以家庭為重。
子博又去咗利物浦，見四圍無人先敢除口罩打卡。
踏入新嘅一年，寶寶即錫啖媽咪。
子博一家人同朋友喺英國食盆菜過節。
立即下載 | 全新《星島頭條》APP : https://bit.ly/3yLrgYZ
