政府昨日進一步收緊防疫限聚措施，並公布「疫苗通行證」詳情，包括限聚令收緊至二人、髮型屋及宗教場所須關閉，直至「疫苗通行證」推出後再重開，以及「疫苗通行證」覆蓋商場、髮型屋、百貨公司、街市市集。消息一出，網民即議論紛紛，追問沒接種疫苗的人進入商場有甚麼罰則，「捉到無打針，係咪停商場十四日」，亦有網民盤點出入口連接商場的屋苑、屋邨大廈及辦公室名單，質疑沒打針是否不能回家及上班。
到底有哪些屋苑及辦公地點最受影響。神勇的網民就有以下分析：現時要經商場出入的港鐵站口，有太和站及九龍站。「太和港鐵站兩個出口都要經商場，咁係咪代表未打針唔使用太和港鐵站？」又如馬鞍山站，兩個出口同樣接駁商場，有人擔心：「使唔使排一粒鐘先入到商場？」有網民就建議：「商場入口和行人通道必須分開！商埸可加建閘口入商場。」
而經商場出入的屋苑，就有九龍灣德福花園、荃灣全．城匯及馬鞍山新港城。其中德福可算最受影響，有網民說：「諗起九龍灣德福就刺激，（政府）肯定冇計過每日有幾多人經商場行出工廠區返工返學。」有網民話：「淘大同九龍灣工業區俾港鐵站同德福閘住咗，冇車而要去對面，一係兜去牛頭角，一係兜去啟德果邊。」起碼要行多十五分鐘。藍田公屋居民也稱搭港鐵返屋企，一定要經過匯景廣場。
也有網民點出將軍澳多個受影響屋苑，幾乎全部都係天橋連住商場，例如日出康城、天晉、都會駅、東港城，有將軍澳居民留言：「咁好多將軍澳居民唔使返屋企……唔通個個好似特首住獨立屋咩！」
食衞局常秘：可獲豁免
至於經商場的商廈，就有太古廣場、國際金融中心二期、環球貿易廣場等，「各大外資公司唔使返工了，全部都係經商場」。
被問到有部分屋苑，需要經過商場才能到達，是否不打針就不能回家，特首林鄭月娥稱，相信實施疫苗通行證後會有不方便，「不打針不能經商場、回不到家，一定是不方便，（不接種疫苗）可以找到另一途徑走。」特首講得咁輕鬆，顯然對部分地區的地理環境未係好了解。好彩，之後食物及衞生局常任秘書長陳松青補充，住戶若進出必須經過商場，屬於合理辯解，毋須遵守疫苗通行證規限，唔係鐵板一塊，大家先無咁驚！
立即下載｜全新《星島頭條》APP：https://bit.ly/3yLrgYZ
