Previous Next
2月9日，日間短暫時間有陽光，間中吹清勁東北風。隔晚美股回勇做好，道指升371點；標指跟納指分別升37點及178點。雖然美股隔晚回勇，但又有大行警告美股風險增加，美銀表示聯儲局正值股市過分熾熱時，收緊貨幣政策，造成更大波動。而一連串嘅危險信號，包括美股估值、市場信心、基本面及技術面等因素，都預視股市今年將表現欠佳。不過，若任由通脹不斷攀升，終將拖累標指跟企業盈利，所以聯儲局行動總比乜都唔做好。而美銀同時預測，今年儲局可能加息多達7次，每次加息0.26厘，明年仲要加息多4次。不過加息並非壞事，美銀認為只要聯儲局傳達出準確信息，即加息旨在控制通脹，而唔係遏制經濟增長，加息係唔會破壞美國經濟嘅。 至於港股經過上周五假後急升後，稍作回吐，噚日喺美國再出制裁內地公司行動之際，生化藥股龍頭藥明生物(02269)急跌逾兩成後停牌，難免影響市場氣氛。不過對於美國制裁中資企業已見怪不怪，料相關影響僅屬短暫。至於藥明生物就公布，公司注意到美國商務部已將其兩家子公司，即無錫藥明生物技術股份有限公司和上海藥明生物技術有限公司(統稱「該等子公司」)列入未經核實名單。 公司了解將該等子公司列入未經核實名單是因為相關美國政府機構無法進行必要核實程序，以便自美國供應商處出口相應設備。公司正積極採取臨時措施，要求將該等子公司從未經核實名單移除。當然藥明梗係話公司會受到重大影響，不過古天后認為藥明無記自己抑或旗下子公司一旦被美國盯上，都係收尾長，股價今日復牌縱有反彈，反彈力度都唔會勁得去邊，70至75阻力唔少，分分鐘呢O的價短期都見唔返。尤其經過兩次跳崖式插水，基本上走勢已走晒樣，可以話已經內傷，過往呢隻古天后愛股，喺對上一次跳崖後成功博反彈，之後已再無沾手，弱勢已成兼穿晒底，一段時間都唔會有乜睇頭，就算今日復牌，都咪多手博反彈。

古天后

(徐狄怡，證監會持牌人)