最新利率期貨顯示，3月份聯儲局加息半厘嘅可能性，已經高達64%。聖路易斯聯儲銀行行長布拉德周四直言，支持至7月1日，聯儲局將累計加息達1厘；而如果3月議息會議鮑爺決定加息50個點子，佢會對呢個決定表示尊重。佢仲表示對最近嘅通脹數據感到憂慮，同時傾向支持今年第二季就開始縮表，更支持賣晒聯儲局資產負債表內所持資產。
隔晚美股急挫，拖累港股ADR及夜期回吐，恒指預期考驗24600至24800水平尋找支持，不過只要恒指仍守於多條移動平均線之上，後市仍有能力挑戰25000點或更高水平。值得留意係北水經過19個交易日錄得淨流入後，噚日終見錄得淨流出，連續多日買貨斷纜，若然今日北水繼續沽貨，係阻礙港股向上挑戰25000關嘅一大阻力。
近日香港第5波疫情嚴重，已港府實施幾達戒嚴程度嘅疫苗通行證措施，更有專家建議港府積極考慮封城抗疫，睇嚟本地經濟定必慘烈。評級機構惠譽前日將今年香港經濟增長預測由3%「劈半」至1.5%，再有券商下調本港經濟增長預測，首季甚至收縮0.8%，全年僅增長2%。大摩預計嚴格嘅防疫措施將持續至3月底甚至4月初，今年首季GDP凍過水。大摩更表示，若變種病毒Omicron疫情在上半年仍然嚴峻，並導致更高的死亡率或住院率，將迫使政府延長嚴格的防疫政策至年中，本港全年GDP增長或進一步下滑至1.2%。而嚴厲嘅疫苗通行證措施，繼續拖住零售業及飲食業後腿，而收緊社交距離措施不僅會限制服務消費，仲會通過影響就業市場，從而打擊消費者對商品消費嘅情緒。
奇怪嘅係雖然疫情日趨嚴重，但港股近日不跌反升，口痕友話可能係生意淡薄，不如賭博，令更多資金投入股市。其實呢個情況曾經喺兩年前出現過，喺2020年疫情爆發相當強勁嘅時候，無論港股跟美股均持續向上，不過當時資金湧向新經濟股，同今次港股低位由舊經濟股帶動向上有別。雖然港股呢邊嘅新經濟股經過去年大殺估值後，今年應該可以穩定落嚟，甚至穩步回升，但主力仍然係靠舊經濟股發力。至於舊經濟股將以圍繞基建主題嘅資源股及基建股表現較佳，個別財力較強嘅內房股，亦有機會喺今年否極泰來。
古天后
(徐狄怡，證監會持牌人)
