本港第5波新冠肺炎疫情仍然嚴峻，醫療系統不勝負荷，不少市民「中招」後選擇在家隔離治療，導致同住家人「困獸鬥」的情況出現！有網民指，父親性格大男人，雖然快速測試結果呈陽性，仍沒有為未確診的母親著想，在家狂咳時仍毫不避忌從不掩嘴，恐會「播毒」，令他不禁替母親擔心。
有男網民在「香港討論區」發文指，家中沒有房間，自己早幾日染疫後便一直縮在床上自我隔離，目前已有好轉；至於同住父親前幾天已開始狂咳，曾做快測呈陰性，不過港男就質疑「佢係都話自己快測做得啱，其實支棉花棒根本冇探好入」。最終至上周三（2日），一直堅信自己沒有確診的爸爸，因為咳嗽情況更嚴重而再次快測，最終結果呈陽性。
港男形容父親「咳再嚴重啲，又快測中招啦，佢先戴番個（口）罩，但又露個鼻出嚟喎，叫佢戴好啲，又話『冇嘢嘅』」，又指對方完全沒有自我隔離的心，「坐喺按摩椅度邊睇電視，邊狂咳，去廁所途中咳，回程咳，每30秒實咳一次，全程唔會揞嘴，唔會避忌。」而未確診的母親每天勤力做好清潔工作，「日日由朝清潔到晚，做到死死吓」，雖想努力在細小家中與丈夫保持一定距離，但無奈對方並不合作。
事主透露，父親經常指責他人出街不戴口罩、隨地吐痰「乞人憎」，但其實自己亦其身不正，「你自己又咪一樣，以為返到屋企（就係）皇道，咩都唔做，返屋企唔會惹到屋企人嘅。講又唔聽，正一食古不化，但真係好燥。」他續指，已安排媽媽暫住居於附近的姐姐家，「雖說媽媽會悶啲，但至少逃離咗個毒氣室先。」
有網民看完帖文後，替樓主母親感辛苦，「你阿媽好辛苦，一日不停做，做死都做唔完」，亦有人指，樓主家根本難以居家隔離，恐怕其母已「中招」，因此認為她不應到女兒家中暫住，恐會「播毒」，「你屋企冇房應該全屋中晒，點解仲叫阿媽去家姐到播毒？你家姐又肯收留咁搞笑，唔怪得香港高效率確診」。
資料來源：「香港討論區」
更多第5波疫情資訊，請到以下專頁瀏覽（按此）
立即下載｜全新《星島頭條》APP：https://bit.ly/3yLrgYZ
