《張敬軒THE NEXT 20 演唱會》昨晚（27日）踏入第13場，這晚他請來同鄉陳蕾一起載歌載舞，兩人合唱《詩郵寄》，High爆全場，不過都唔夠陳蕾送上的禮物咁哄動！最近愛上針織的陳蕾送上手織的咪套，既美觀又可以保護個咪，更親手幫軒仔「笠」上去，引得觀眾狂笑，連軒仔都忍唔住話：「呢份禮物真係好爆。」
軒仔在台上介紹同鄉陳蕾時，表示二人來自同一城市，而且同樣是唱作人，又分享對陳蕾的感覺，「每一次喺工作場合見面，都覺得佢好冷艷，好Cool，好有距離感，點解呢個新人成日口黑面黑，哈哈。」而陳蕾就表示一直都好欣賞軒仔，「我中學時喺廣州睇過你好多演出，當時你剛出道，廣州出咗個歌手叫張敬軒，我哋周圍介紹畀身邊同學知，大家覺得好驕傲好光榮。今日好開心有機會，你邀請我來做嘉賓。多謝你！」至於軒仔覺得她很有距離感，她表示：「我唔係有距離感，為咗証明我其實好貼地，又隨和，我準備咗一份禮物畀你，我係安排得比較後面嘅嘉賓， 送禮比你好大壓力……我諗過，想從早餐呢方面出發，送鹹菜配白粥都幾好食……」軒仔忍唔住插嘴：「難道我還未夠鹹？可以再鹹少少？」引得觀眾哈哈大笑。
陳蕾最後選擇送上親手織的禮物，不過當她拎出條狀物時，全場都笑到反肚，軒仔即追問，「喂，你呢個乜嘢嚟先？咁嘅形狀？哈哈哈……離遠望佢，我估都差唔多Size……哈哈哈……中間仲有個心形，可以笠喺邊呢請問？你知『冷』嘢都刮……哈哈哈……」一連串妙語連珠爆發，觀眾全部笑到碌地兼拍爛手掌，狂笑狂起哄，陳蕾就解畫話，「其實係笠喺個咪到……」她更熱心提出：「你要唔要我幫你笠？」接着就親手幫軒仔戴套，軒仔卻擔心觀眾離遠拍照會有色差，提醒大家個套是粉紅色的。
昨晚Encore部份，軒仔請來了小師妹許靖韻（Angela），兩人一起合唱《別為我好》，Angela出道時有個花名叫「小背心」，所以昨晚她亦帶了一件小背心上台送給師兄，並與全場觀眾一起歡呼大叫軒仔即場換上給大家看看，「因為你之前送過件三點式畀我，提醒我做人做事要記得三點，同事又話你操得好Fit，但冇乜點露 ，所以我諗住送件小背心畀你。」全場觀眾這時幫Angela一起大叫：「除衫！」軒仔笑住話，「你唔係諗住叫我即刻着吓嘛？你哋未見過麻甩佬着背心咩？」更作狀除衫，搞到全場非常興奮，但到最後還是走數，笑稱：「嘩，要睇我即場換衫，張飛就要$1680！哈哈……應承你，下次見你着畀你睇！」
更多新冠疫情資訊，請到以下專頁瀏覽（按此）
立即下載｜全新《星島頭條》APP：https://bit.ly/3yLrgYZ
