飲食業前線員工經常都要面對食客麻煩要求。有從事飲食業的網民於社交平台發文力數食客5大罪狀，並批評港人欠缺同理心難服侍，引起一眾網民的熱論。
該名網民於「連登討論區」發文訴說，力數食客5大罪狀，包括經常詢問餐單上沒有的菜式，「西餐走嚟問有冇雲吞麵、中餐走嚟問有冇卡邦尼意粉」，令他大感不滿，直言「咁想食咪入廚房煮囉」；樓主又指，食客經常提出古靈精怪的要求，「嘢飲我哋已經有得揀少甜，咩叫少少甜？咩叫微甜？」，並指茶飲店能選擇甜度，不代表食肆亦可以，「唔好諗住其他餐廳食肆有得咁做」。
樓主指，不少食客會想將菜式內容按自己心意轉換， 例如四寶飯早已列明指定4個餸，「又要問可唔可以轉呢樣嗰樣，咁想揀咁想轉你咪去食車仔麵囉。」他又提到，許多餐廳為節省人手成本會提供二維碼（QR code）下單，惟食客堅持要向侍應下單，直言因樓面減少人手，令原本員工的工作量增加，「依家仲要招呼你一個幫你落單」，批評客人跟不上時代步伐。
最令樓主不忿的是，有食客總是「趕尾班車」，在最後一刻才下單點餐，「鋪頭8:00截單，8:30關門，啲客人都夠膽死7:59入嚟」，甚至到關門時間還不願離座，「面皮真係厚X過地殼」，並批評香港人欠缺同理心難服侍，「畀啲同理心好嗎」！
帖文引起網民熱議，有網民認同香港人要求多多，「想要五星級服務咪去高級餐廳囉，食得嗰幾十蚊喺度嘈喧巴閉」、「叫個麵又話煮淋啲，仲有叫外賣熱檸水走水」、「個個當正自己大爺，基本對人嘅尊重同同理心都冇」；有網民則指客人要求仍屬合理範圍，「人地都係問下啫，唔得你咪講囉」、「咁如果去茶記想食菜芯炒牛肉但餐牌無，問下好合理啫」、「熱檸水走水係因為外賣先會，拎到返去飲都浸到酸晒點飲呀」。
資料來源：連登討論區
立即下載｜全新《星島頭條》APP：https://bit.ly/3yLrgYZ
