林日曦受邀拍某台真人騷臨時被飛起出Po呻：高層唔OK我

毛記電視前話事人林日曦今日於社交網打長文，透露今日收到通知被飛出某台真人騷拍攝，他重申不是控訴，只是感到不開心，想圍爐抒發一下心情，「某個電視台，有一個節目搵我嚟緊七月、八月、九月、十月，共拍攝15集全新真人show節目。而且除了拍攝時間外，他們說我要花大量私人時間練習和鍛鍊，而我立刻說了ok，因為那是我從前很喜歡但放低了很長時間的項目，而且件事對於我來說非常熱血。」

林日曦本來已經改晒本來的行程遷就節目開拍，但而家冇得參與。

林日曦本來計劃會去個長旅行，不過為了參加這個節目而更改自己的行程，並承諾會落力配合節目組。不過才過了半個月，林日曦今日就收到通知，該電視台高層「唔OK」佢，「他們的節目會繼續拍攝，但就同我bye bye。」林日曦明白與節目組商量的一切都是口頭承諾，仍未簽約，因此沒有怪工作人員，「我當然唔係投訴，我又唔係好忙嗰啲人，再改返自己啲行程都冇幾難，冇幾巴閉。電視台有電視台的政策、考慮，我也管不了，而且工作人員都只係磨心，我冇打算追究亦都冇得追究。我只係仰天慨嘆一下啫，應該可以啩。」

林日曦透露被退出節目的原因，因為高層唔OK佢。

林日曦表示令他最失望的，並非更改自己行程遷就節目，而是他真心鍾意該節目的意念，「真係覺得好熱血，可惜現實比較冷血，我錯付了熱情。最後謝謝工作人員同我一齊熱血過，祝你們拍攝成功，但到時我唔會睇了，怕勾起傷心事。」帖文獲得大量網民安慰，又引起網民討論是邊間電視台。而圈中人田蕊妮及李綺雯都留言表示感同身受，「U r not alone 啦」、「I know that feel」。

帖文引來網民與圈中人安慰，田蕊妮都暗示曾有同樣經歷。

李綺雯似乎都試過。

有網民猜測飛起林日曦的可能是一向盛產真人騷的ViuTV，更Po出ViuTV早前為真人騷《演奏1TAKE過》招募樂器高手的截圖，估計林日曦本來有機會參加這個節目，事關林日曦本身都係音樂人，節目組起初可能曾邀他參加。其實ViuTV開台初期，林日曦亦曾參與真人騷《跟住矛盾去旅行》，與立場有別的蔣麗芸一齊去旅行曾引起熱話，但之後都沒再拍攝ViuTV節目。有網民於討論區留言質疑，林日曦日前於社交網談到香港開騷的「售票文化」，令人聯想到MIRROR紅館騷賣飛的爭議，是否因而得罪ViuTV高層，不過日前ViuTV節目《爆谷一周》先請過林日曦做嘉賓，認為林日曦應該冇畀ViuTV封殺。另外亦有網民猜測，飛起林日曦的電視台可能是近年轉戰OTT平台的亞視，事關亞視早前都表示會製作綜藝節目。