獨家丨七師傅唱笑會耍全港獨家「狗吠鞭」狂執MIRROR二攤拍廣告

54歲嘅七師傅(七仙羽)處女下海，將於8月12及13日在九展舉行《師傅七都識唱笑會》，雖然喺一票難求嘅MIRROR演唱會後開Show，但佢唔擔心票房，因為背後有「鏡粉」支持：「我係鏡仔『二攤王』！執過好多佢哋手指罅漏出嚟嘅廣告，鏡粉搶唔到偶像嘅飛亦會轉嚟搞我，所以我啲飛好搶手。」更揚言炒價高達萬元一張，最後佢作出呼籲，「大家要買就趁手。」採訪：方騫平攝影：沈健程髮型、化妝：Gaby Lai 場地：圓山台灣料理

七師傅唱笑會門票分三個價錢，最貴賣777元。

七師傅指，7月7日優先預售反應好好。

首次擁有自己嘅舞台，七師傅坦言好意外：「作為師傅每日主要係唸經及修行，從來冇諗過登上舞台唱歌及跳舞。」問到由玄學家變成藝人係咪好有成功感？七師傅竟然話冇乜，她語帶堅定解釋：「因為我一早經已成功咗，我個人容易滿足。其實呢個Show畀大家玩吓、開心吓啫，不過因為唔係免費，啲人會有期望，所以要做好啲，但冇乜壓力。」她表示Fans要求佢唱歌、跳舞同埋着少啲衫：「夏天着少啲衫冇問題，不過我唔識唱歌及跳舞，交由導演揀啲『飲歌』等佢自肥。」

七師傅唔擔心唱笑會票房。

為了表達唔同形式嘅「師傅愛你」，七師傅喺唱笑會宣傳海報中化身多個造型。

七師傅去年奪「風雲人物」獎，她承認自己早已成功。

唔敢對張敬軒耍「狗吠鞭」

今次唱笑會「主菜」係唱歌、跳舞及棟篤笑，七師傅度緊一道「甜品」益大家：「因為喺《七救星》中耍過嘅『閃電7連鞭』經已Out咗，到時可能會玩更難嘅『狗吠鞭』。」師傅愈講愈興奮，講到繪形繪聲：「呢門功夫好Hit，有好多藝人練緊㗎！佢冇正常嘅拳法，耍拳時會好似癲狗咁，唔知幾時出拳，會突然撲上前咬你一啖，所以唔可以同觀眾集體練拳，萬一我咬你，你咬我咁點算呀？」當追問有咩藝人練緊時？七師傅即改口補充：「「狗吠鞭」又叫「癲狗鞭」，我成日上網發掘全世界嘅新嘢，見其他地方嘅人練，但香港就未有人識呢樣嘢，除咗我，呢個鞭法會出奇不意，連精神病患者都驚，到時可能會加啲創意落去表演，但我都要諗吓，費事啲人話我傻。」

七師傅喺《七救星》中耍過嘅「閃電7連鞭」已out，唱笑會中有機會玩更難嘅「狗吠鞭」。

追問佢會否向「下世老公」張敬軒耍「狗吠鞭」時？七師傅忍住笑繼續說：「我唔好意思，萬一咬錯部位點算呢？師傅唔呃人，呃咗佢嚟，然後咬佢一啖，第日佢唔會再嚟，我要放長線釣大魚喎。」

七師傅強調同軒仔仲未講掂數，未確定係咪做佢「下世老婆」。

「下世老公」軒仔喺社交網中力推七師傅唱笑會。

為鏡仔唸經祝開Show順利

另外，7月7日優先預售反應好好，七師傅聽聞炒價去到7000幾蚊一張：「我啲朋友、徒弟都買唔到。」她估計明天正式開售時會炒至過萬一張。她又說，「因為鏡粉同MIRROR影唔到合照、撲唔到佢哋啲飛就會嚟搞我...」師傅近兩年接咗60個廣告，她坦言：「有啲MIRROR冇期拍，廣告商都會轉軚搵我，我唔介意執佢哋唔要嘅嘢，我執完咪去做善事幫吓人囉，但都會同MIRROR唸經做功德，希望佢哋紅館演唱會順利同埋身體健康。」問到有幾多廣告係執鏡仔二攤？師傅突然失憶：「唔記得」。最後，七師傅自爆幾個月前開始做定準備，向一班生意人朋友撲到過百張MIRROR演唱會飛，為鏡粉代勞。