羅家英接受香港電台第一台《舊日的足跡》的訪問,談及對粵劇發展的寄望,分享加入電影圈的原由,並首次透露曾兩度有衝動向汪明荃求婚。
![羅家英上《舊日的足跡》接受主持車淑梅訪問。](https://image.hkhl.hk/f/1024p0/0x0/100/none/cf6ba8d6bd7588c5031170df3c6c2b37/2022-07/%E3%80%8A%E8%88%8A%E6%97%A5%E7%9A%84%E8%B6%B3%E8%B7%A1%E3%80%8B%E7%AF%80%E7%9B%AE%E4%B8%BB%E6%8C%81%E8%BB%8A%E6%B7%91%E6%A2%85%E8%88%87%E7%BE%85%E5%AE%B6%E8%8B%B1.jpg)
家英哥有三重身份,既是粵劇大老倌、喜劇聖手亦是汪明荃丈夫。他於節目中以粵劇、電影及為人丈夫作排位,他笑稱:「當然以粵劇為主,其次係電影,跟住就係做人老公。」羅家英投身粵劇界60多年,一直以傳承粵劇為使命,揚言希望楊潤雄局長多留意粵劇界。1988年他與汪阿姐組織了「福陞粤劇團」,成班之前二人於1987年合作演出粵劇《穆桂英大破洪州》。之後家英哥還以為對方會回歸電視和唱歌的本行,豈料汪阿姐表示要跟他組織劇團長期合作,「我冇乜所謂,我冇花旦……我哋合作愉快,但只有一件事,佢最怕我用佢個名去宣傳自己,我感覺到佢介意,不過我冇咁樣做。我都知阿姐迷初時唔鍾意我,但同我冇乜相干,因為佢繼續鍾意我,哈哈!」
![羅家英與太太汪明荃都以傳承粵劇為使命。](https://image.hkhl.hk/f/1024p0/0x0/100/none/6b09ed319d40a7c4815cef9251b99e8e/2022-07/%E7%BE%85%E5%AE%B6%E8%8B%B1%E6%B1%AA%E6%98%8E%E8%8D%83%E6%BC%94%E3%80%8A%E8%8B%B1%E9%9B%84%E5%8F%9B%E5%9C%8B%E3%80%8B.jpg)
汪阿姐開聲攞家用
羅家英笑言自己吸引汪阿姐的方法是「真」,而阿姐亦不時在歌迷面前維護他:「佢應該咁做,我冇要求過佢養我、帶挈我、畀錢我。你有你嘅,我有我嘅,我哋分得好開。婚後一齊住我有畀家用,佢好緊張㗎,佢話『你要養老婆,你唔使養老婆咩?』佢有錢都要攞你㗎!(做汪阿姐老公好開心?)呢啲喺世俗嘅眼光,我唔覺得佢高高在上,我感覺大家好平等。佢有錢、有名氣,我唔介意,亦都唔稀罕,所以冇呢種心態。」
![二人早前慶祝結婚13周年。](https://image.hkhl.hk/f/1024p0/0x0/100/none/f7a55cf10d494a48a3a03aa1204c40a1/2022-07/WhatsApp_Image_2022-01-26_at_13_23_03_1_.jpeg)
曾想於金像獎台上求婚
外間傳聞家英哥向阿姐求婚19次,家英哥否認,更指對方家庭觀念較他重,而他反而有結婚恐懼症。他透露2002年阿姐患癌,他沒有提出結婚,直到2004年他患肝癌,阿姐開到聲明示想嫁,「只係輕輕講,喂!我哋幾時結婚?我就話,結咩婚?唔好結住,睇定啲先,都未了解清楚......」家英哥回想曾經有過兩次結婚衝動,第一次是汪阿姐擔任人大要上深圳開會,他想到對方若從政,必先要處理好家事,所以需要給她一個名份。後來她做了政協便沒有再刻意提及。第二次是1996年,他憑電影《我愛廚房》獲提名香港電影金像獎最佳男配角,自覺勝算高,於是計劃得獎之際,在台上即場求婚,令金像獎有一段佳話,「我請阿姐陪我去睇金像獎,佢都覺得我機會高,點知輸咗。我有啲唔忿氣,因為我覺得我由頭到尾扮女人,好有難度。不過呢件事之後,我亦都冇出聲(求婚),金像獎就冇咗段佳話嘞!就係呢兩次,我一直冇話畀佢聽我有咁嘅打算……幾時講?從來都冇講,就今次講啦。」
![羅家英曾想在金像獎台上向汪明荃求婚。](https://image.hkhl.hk/f/1024p0/0x0/100/none/55c0f5883eb075602ac059692a72a554/2022-07/%E5%9C%96%E7%89%87%E4%B8%89.jpg)
兩個人一條命
後來,家英哥的媽媽離世要出訃聞,他要決定如何加上汪阿姐的名字。當時兩人已有結婚的感覺,於是去了拉斯維加斯註冊結婚。家英哥大讚阿姐是勤力的太太,家中雜務、粗重功夫她都會做,「佢鍾意做嘢,身體好過我,早上9點幾就起身精力無窮。我無想過退休,可能80歲啦。我有想過畀一啲遺產佢,畀一啲細佬。我對人生已睇化,經歷咗幾次大手術已冇乜嘢恐懼。好感恩個天對我不薄,我咁嘅學歷、性格,都可以做到咁已經好滿足。多謝個天畀我一個咁好嘅太太。黃昏之時,都畀我美麗嘅華彩!我哋相處之道就係,我有病得半條人命,佢有病得半條人命,兩條人命夾埋一條人命,就係你中有我,我中有你。」於節目中隔空向太太示愛。
星島新聞集團慶回歸25周年專題網站,請即瀏覽
立即下載 | 全新《星島頭條》APP : https://bit.ly/3yLrgYZ