美國行｜夏蘭特地標十分鐘士哥曼城一球小勝拜仁

兩支歐洲勁旅曼城和拜仁慕尼黑於周六在美國進行友賽，前者焦點新兵艾寧夏蘭特正選上陣演地標戰，更只花十二分鐘就士哥，終助球隊小勝1：0，為下周社區盾鬥利物浦做好準備。

兩軍今場都派出一隊正選球員上陣，其中上場友賽未有上陣的曼城焦點新兵射手艾寧夏蘭特，今場終於披甲。賽事因雷暴關係而延遲開賽，但藍月極速入局，頭五分鐘已有奇雲迪布尼和基亞利殊幾乎士哥。十二分鐘，基亞利殊禁區內橫傳，夏蘭特飛身門前撞入先開紀錄，地標上陣只約十分鐘即建功。

開紀錄後，因再受雷暴影響，球證決定暫停賽事。擾攘一輪後賽事重開，而上下半場比賽時間將縮至四十分鐘，中場休息時間亦縮短。重開後曼城繼續掌控大局，夏蘭特更於完上半場前再將皮球送入網，但越位在先食詐糊。下半場雙方大幅輪換，拜仁亦一即未能創造有威脅攻門，最終藍月小勝1：0。今場乃藍月最後一場熱身賽，下周日他們將於社區盾鬥利物浦。