MIRROR演唱會丨經理人花姐上台交代道歉歌迷怒斥：唔會原諒你

人氣組合MIRROR演唱會發生嚴重意外，兩名舞蹈員表演期間被鬆脫的大屏幕擊中，兩人送院醫治，一人嚴重，一人情況穩定。MIRROR經理人黃慧君意外後到台上開咪，向觀眾道歉，有歌迷憤怒大嗌「唔會原諒你呀」。

意外發生後，黃慧君到台上開咪請觀眾離開，「希望大家有秩序離場，對唔住，今日大家嘅門票我應承大家會處理，跟住我應承大家會安全處理個Show，希望大家而家首先慢慢有秩序地離開現場，好唔好？多謝大家。」

期間有歌迷不滿主辦單位無正視安全問題，在黃慧君發言期間大嗌「我唔會原諒你呀，唔係錢嘅問題呀，你仲講安全，日日都係咁。」