蔡少芬翹男人手激嬲張晉自爆曾遭祖藍「出賣」：欠我一世

由TVB首席創意官王祖藍擔任主持的《有個閨密叫祖藍》，將於今晚起一連八集播映。打頭炮的嘉賓，是與祖藍相識超過16載的蔡少芬（Ada），二人除了大玩「閨密快問快答」、製作組指定的各項「閨密任務」外，還相約整曲奇兼歎日本菜。相識多年的二人錄影期間無所不談，除了有大量湊仔湊女經外，向來「乜都夠膽講」的Ada，更會大爆戀愛史、求婚瘀事、夫妻相處之道、以及老公張晉、祖藍與自己之間的恩恩怨怨。

Ada與祖藍在上海甫見面即瘋狂喪笑，難怪女方一開始即笑言「擔心會笑到有眼紋」。翹住手暢遊當地的二人，談到當年忽發奇想於首映期間即興翹手，Ada大爆曾因此事激嬲張晉：「我老公好介意，問做咩要咁樣，因為嗰時我同佢都未公開。當時我當祖藍兄弟咪翹住手行囉，我以為冇人相信我哋會拍拖㗎嘛。」

Ada擔心笑到有眼紋。

估唔到當年Ada貪玩同祖藍翹手一幕，令到張晉呷醋嬲豬。

張晉都係因為太愛Ada。

Ada同祖藍相識十六年。

二人大談仔女經，祖藍話其實好擔心阿囡愈大愈似自己。

Ada又大爆曾因祖藍「食言」深感被出賣而嬲爆對方，豈料此事同樣觸及了張晉神經，張晉更反問Ada「嬲啲咩」；不過嬲到入晒血的Ada一於少理，更沉溺於重新量度與祖藍友誼的層面上：「嗰時我就開始懷疑，我同你友誼係咪只係柴米油鹽。」愈講愈「嚟料」的Ada不但邊說邊厲眼望住祖藍，更咬住祖藍不放謂：「其實你係咪應該道歉呀？」、「你係欠我一世㗎！」火藥味十足之餘，不失搞笑。

雖然今集訪談嘉賓是Ada，但張晉「出鏡率」其實幾可匹敵，皆因Ada三句唔埋兩句就提及張晉，除公開詐老公型，又大談如何被老公及兩名囡囡「技術性擊倒」兼制服。本集另一驚喜位是，Ada 1995年於TVB舉辦籌款活動中表演的「空中呼拉圈」絕技將重現熒光幕。