張繼聰今日到尖沙咀出席演唱會及創立品牌發佈會，將於10月在麥花臣舉辦演唱會的他，很珍惜這個七年後再開show的機會。對於早前MIRROR演唱會發生嚴重意外，張繼聰表示今次的演唱會將會偏向簡單為主：「比較似一個live show，所以唔會有咁多機關。」
提到MIRROR演唱會上的意外，有欣賞頭場的張繼聰表示：「都見到有啲嘢未綵排好，呢個我都唔評論，而家呢一刻嚟講，最傷痛都係阿Mo（李啟言）嘅遭遇。」看到意外發生的影片覺得很震撼的他，坦言當晚也睡得不好：「好難過，因為呢啲係好近嘅人，雖然我唔識阿Mo，但同大家嘅心情一樣都好難過。我覺得全香港市民，甚至乎全球人睇到新聞都會好難過，再加上我做呢行，入邊好多人我都識，呢個係一個好難過嘅事，呢一刻希望阿Mo可以快啲好返。」而他亦指事後有跟囡囡提過發生意外，但不會讓她觀看影片。
張繼聰指事後有傳訊息給MIRROR，但現在最好是給他們時間及空間：「好戥佢哋難過，佢哋嘅痛苦係大眾都唔會明，佢哋承受緊好嚴重嘅創傷。」對於有網民指Edan（呂爵安）與Anson Lo（盧瀚霆）在出事後仍繼續唱歌，他指這就是表演者需要承受的難處：「大眾唔會明我哋喺個台經歷緊啲乜嘢，普通市民睇到呢條片，係會知道5秒後發生咩事，但佢哋喺現場嘅時候，就算一個普通嘅觀眾，都未必即時反應到，如果再講Anson Lo同Edan，佢哋喺個表演緊、好亢奮嘅狀態，如果喺個台唔帶耳機，係唔會聽到自己唱緊乜嘢，所以喺嗰刻，我都幾肯定佢哋頭果5秒以內唔知發生咩事。Anson Lo同Edan同阿Mo嘅關係，一定畀我哋任何一個人更加密切，佢哋點會唔難過？有好多人一定會討論呢啲事，每個人都有自由，但表演者要承受嘅嘢，係你哋唔會知，作為一個同行，我只係覺得佢哋好慘，呢一種執生係超越咗我哋平時可以執生嗰種，去到咁大件事，點會反應到？」
張繼聰又謂舞台上每個人現在應該仍處於一個很痛苦的狀態，故希望大家不要再用自己的揣測傷害他們。
星島新聞集團慶回歸25周年專題網站，請即瀏覽
立即下載 | 全新《星島頭條》APP : https://bit.ly/3yLrgYZ
