岑珈其首任男主角的電影《緣路山旮旯》於本月4日上映，由於岑珈其近年拍攝不少ViuTV劇集及參與綜藝節目《膠戰》系列都有亮眼表現，有不少網民都入場支持佢及其他本土演員。不過日前facebook專頁「公仔生猛」中專寫影評的寫手「玫瑰」，就發長文批評《緣》片，更力踩岑珈其外貌，引來網民批評好刻薄之餘，亦引來岑珈其親自回應。
「玫瑰」於文中稱岑珈其為「毒X」（意指：欠缺異性緣的單身男性），指電影令人難受。片中岑珈其配搭5位女主角余香凝、陳漢娜、梁雍婷、蘇麗珊及張紋嘉，有不少感情戲，岑珈其起初被導演黃浩然挑選做愛情片男主角，他都有些驚訝，但他接得套戲都非常努力演出。但卻被影評人「玫瑰」批評其長相，「我忍受唔到方便LOSER代入嘅弱蟲X毒男主角，配埋一堆靚／高過男主角太多嘅女角，佢哋任何稍為親密嘅感情戲都毫無說服力，甚至令人可憐女角，何必呢？」又指自己入場並非為了看岑珈其演出，「但佢血色稀薄嘅毒X嘴極具存在感，每一次見到佢大大力溝女，心裡面就X出聲，如果你入場，你會同我一樣，想跳入個SCREEN打X佢，想坐時光機欺凌佢，欺凌到佢大個唔敢做演員。」最後更批評導演將電影拍成咁，質疑對方有否盡導演的責任，帶出電影「叫人留低」的主旨。
影評人「玫瑰」的言論引來網民批評，「老實講，你可以唔鐘意依套電影，但請唔好人身攻擊仍在努力為香港電影努力的人。」又反問影評人「玫瑰」：「做人做到咁mean（刻薄）咁負面，好咩？」更有網民指他的言論似乎起了負面宣傳之效，有網民稱因他的批評，有意入場觀賞《緣》片。
岑珈其身為被批評的重點人物，就高EQ留言回應，「多謝你嘅分享，我嘅樣衰令你難受，影響到你唔好意思，但我真係真係好鍾意做演員，就算你坐時光機返去我以前細個欺凌我，我都會想做演員。樣衰我改唔到，但我會努力再做好啲演出，希望將來可以得到你嘅支持。」影評人「玫瑰」即笠水回應，稱岑珈其演技冇問題，只係認為套戲好冇說服力。其他網民就於岑珈其的回應下留言力撐他，大讚他演得好，要繼續努力。
而影評人「玫瑰」似乎亦知自己言論得罪網民，今日（8日）再發文稱：「高興見到大家踴躍坐時光機嚟，送上猛烈回覆，剃人頭者人亦剃其頭，唔小心做咗光頭仔。我好鍾意寫影評，唔會放棄，一定繼續寫，希望大家以此力道，繼續關注香港電影 。」不過網民亦不太收貨，直接叫他：「算吧啦！」
星島新聞集團慶回歸25周年專題網站，請即瀏覽
立即下載 | 全新《星島頭條》APP : https://bit.ly/3yLrgYZ
