獨家丨黃夏蕙親揭整容之謎直擊離港前24小時狂掃假髮雞眼膏

上周四(11日)早上黃夏蕙帶著離愁別緒同老公潘炳烈出發到美國生活，《頭條娛樂》記者直擊她離港前24小時嘅動態，再次強調「只係」89歲的夏蕙BB由好友方俊(張偉文經理人) 陪伴，連踩幾個地方狂掃化妝品、藥物及假髮！她還揭開多年來整容失敗之謎，強調自己鼻高、眼冇問題，反問：「做乜要整？」暗示自己從來冇整容。另外BB強調唔使隔離後會返港，因為要處理已故老公家族過億遺產。採訪：方騫平攝影：譚志光

「變髮」後黃夏蕙變得好Hip Hop，勁好笑。

當日正值下雨，好彩有張偉文嘅經理人方俊拖到實，照顧周到。

黃夏蕙上周四隨老公潘炳烈離港。

BB強調唔使隔離後會返港，因為要處理已故老公家族過億遺產。

離港前一天的黃夏蕙忙到癲，除咗一早要去做核酸檢測，又要去銀行，午飯後連踩兩間藥房掃止痛及止屙藥、雞眼膏、胃藥，再轉戰假髮店，買咗5個長、短髮作替換，最後用埋消費券尾數購買眼睫毛液、睫毛膠水、胭脂、粉底、眉筆等，好彩獲照顧開老人家的方俊陪伴，接載她出入，節省唔少時間。

夏蕙BB話腳底生雞眼好痛，要買大量雞眼膏去美國備用。

BB用埋消費券嘅幾百蚊尾數狂買化妝品。

照顧開老人家張偉文的方俊陪伴夏蕙BB周圍去。

已故老公讚佢引死人

夏蕙BB試戴假髮時顯得相當興奮，仲揀咗啲狂野爆炸頭作登台用：「疫情下封關，有3年冇返內地買假髮，用開嘅都殘晒！喺美國買會好貴，所以統統都會帶走。」貪靚嘅BB認為全世界女人都愛靚：「𠵱家啲皮皺晒，唔想變老婆婆，最想打抗皺美白針。」對於多年來一直被指整容失敗，BB一口否定：「以前冇呢啲嘢，我個鼻咁高仲整乜鬼呀！少年冇醜婦，𠵱家我五官同後生時咪一樣，人哋噏咪由人哋囉。」夏蕙BB仲自爆，跟已故老公胡百全初相識時，對方用「放路溪錢」形容她，喻意引死人，因為以前要撒溪錢引領棺木前進，BB講返呢段故依然冧到爆：「我都係第一次聽呢句話，心諗『咁巴閉引死人？』嗰時係讀書女，天真無邪連胭脂都唔會搽。」

BB強調黑色髮尾全部係真髮，而且冇白頭髮。

BB同方俊試狂野假髮，好搞笑。

BB強調從來冇整容，𠵱家眼耳口鼻同以前一樣喎。

BB好貪靚，就算要戴口罩，食完葡國雞飯都要即刻補搽唇膏。

絕對冇跟林蛟拍過拖

黃夏蕙滿足地再爆陳年情史：「以前追我嘅人多到數唔晒，我好鍾意愛情，但只係對老公專一，對追求者會落閘，生命中只得兩個男人。」記者指她數漏初戀情人林蛟。BB強調因為旅行時對方要求合照，張合照就惹嚟誤會，並風趣地解釋：「後期我哋一齊拍戲啫，當時我有車咪車埋佢變咗『同車』囉，當年我好忙，冇機會一齊，而且佢一直有老婆，我唔覺得佢靚仔，唔鍾意戲行啲人咁隨便，鍾意胡百全斯文淡定、靚仔、官仔骨骨、有學問。」至於潘炳烈除咗型，仲係鬥車天才，鍾意佢夠Man：「鍾意一個人，喺佢面前扮貓做狗乜都得啦，否則做老虎都冇用，如果同佢唔甜蜜唔會跟佢去美國。」不過，兩個比較下，BB坦言最愛一見鍾情嘅胡百全，尤其他放下公職，不愛江山愛美人。

就係呢張旅行相，林蛟要求同BB合照搞到惹上緋聞。

當年胡百全帶黃夏蕙一齊去拉頭馬。(

9年前BB陪同潘炳烈出戰《蓮花大中華盃賽》，BB形容當年老公77歲仲型到爆。

夏蕙BB還說：「個天『文武狀元』都畀晒我，令我呢生冇憾，所以做人好開心冇壓力，更加要錫多啲老人家同年青人。」方俊挨實話唔捨得BB，尤其欣賞她敢言及正義感，肯為年青人發聲。BB力撐MIRROR：「意外嘅嘢冇人想，希望公司作出補救後，佢哋又梳理好情緒就重新開始，我都鍾意佢哋㗎。」最後BB承諾唔使隔離後會返港，因為她要返港處理胡家留畀佢及子女以億計算嘅遺產，打算用嚟做慈善。