仁愛堂丨草蜢10月紅館開演唱會身經百戰舞台零機關都唔怕：咩場未跳過

草蜢昨晚（20日）到電視城為《善心滿載仁愛堂》擔任表演嘉賓，已在香港5年沒開騷的他們透露10月底會在紅館舉行演唱會，但場數暫不方便透露。

由於早前MIRROR演唱會發生嚴重意外，故他們坦言今次舞台設計仍在研究中：「好多嘢好早已經計劃好晒，所以而家都有好多嘢修改緊，我哋只需專注練歌、練舞同記歌詞就得。」問到舞台到時候是否沒有機關？他們說：「我哋好乖，會跟足指引，要睇吓政府最新指引，因為最近出嘅指引暫時去到9月尾，我哋個唱係10月。（如果真係唔畀有機關？）我哋有舞，唔怕，我哋咩場未跳過，一出道咩舞台都涉獵過，難唔到我哋草蜢，最緊要係大家睇得開心。」又謂每次都會花很長時間做綵排，「我哋由農曆新年後已經準備演唱會，因為要編歌同編舞，所以要好早做。」並指臨開騷前亦會找地方畫一比一舞台去練習。

蔡一傑已為演唱會創作主題曲，今次個唱則會以「RE」為主題，到時會讓大家看到全新2.0的草蜢：「隔咗幾年冇開騷，大家都餓咗個舞台好耐，我哋會將啲歌重新編曲，將呢幾年嘅悶氣、煩厭嘢一次過放出嚟。」至於到時是否會以實名制賣飛，他們表示只負責創作部份，行政部份就交由公司處理。