洪嘉豪將於11月12日及13日舉辦第一個個人演唱會 ，兩場演唱會加埋等同開兩場紅館三面台，而現時內部認購亦已爆滿。除咗講到今次演唱會嘅特別構思，嘉豪仲話會有新驚喜畀大家！
【點擊睇海報相花絮】：
象徵演藝生涯的縮影
早前嘉豪為演唱會影海報相，海報特別將四季置於身上，服裝七彩繽紛之餘，臉上又有一滴銀色淚，象徵他演藝路上一路走來的縮影。嘉豪表示：「好多嘢都係由一個循環組成，人生、愛情，我新歌《還原淚》都係講緊一個循環。今次想成個主題都圍繞開心歡樂，所以你見我身上都係七彩繽紛。但又有春夏秋冬循環縮影。」
希望親友、fans見證
提及今次個唱嘅規模其實等同兩場紅館咁多人，嘉豪就好驚訝，仲話：「第一次聽到腳都震。（內部認購已經爆晒喇！）我都係而家先知！慘啦咁就，我仲有好多兄弟、朋友、屋企人未落飛……我仲獅子開大口答應咗佢哋，今次一定買到飛，我點算啦.....而家點算？」嘉豪仲話，自己一直希望開戶外演唱會，而今次仲有屋企人、朋友，同埋一班fans見證：「希望佢哋全部都可以在場，同我一齊見證呢個大日子，佢哋無論我高高低低都喺我身邊，對我嚟講，係好重要的人！」
預告會有新驚喜
嘉豪表示上次同MC合作嘅「FRENEMY Live 2022」演唱會已經開始操肌，仲話會一路keep住。至於會唔會除衫，嘉豪就話：「11月都涼啦……到時入場睇囉！」而跳舞就「一定會跳得好過上次！」除此之外，嘉豪仲預告埋會有新驚喜！嘉豪嚟影樓前原來發生咗個意外：「我住得遠係人都知，要11點到達開工，我好早起身準備啦！好準時過緊海，諗住仲有七分鐘，一定早到，點知就喺呢一刻，喺隧道入面，聽到架車「噗、噗、噗」聲。我當時喺中間線停唔到車，心諗唔係爆胎呀？捱到出隧道口，停埋一邊一望『爆晒！』好彩有個職員哥哥嚟救我，問我使唔使幫手，仲開條私家路我行，我入私家路之後，一、兩分鐘轉出嚟就已經係汽車維修店！雖然遲到少少，但係都安全到步。」
在場同事即刻反問：「你唔係倒霉喎，你係好好彩！你爆咗有人幫，仲開條光明大道你行，你行運啦你！點會係倒霉？」嘉豪傻笑答：「係喎，我真係要改吓自己悲觀性格！」、「唔駛叫拖車！」
【其他文章】：
「五虎」最靚星二代逐個睇！三哥囡囡影半裸寫真超狂野 湯鎮業兩女都係Model級
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
