立會選舉｜管浩鳴:如當選會考慮方法堵塞漏洞 避免陳同佳事件爭議重演
2021-12-20 00:22
立法會選舉投票結束，選委會界別候選人、聖公會教省秘書長管浩鳴牧師上電視節目時，被問及如果當選，會有何新方法處理陳同佳事件，他認為需要考慮方法堵塞目前漏洞，例如是域外法權等，避免事件爭議重演。
管浩鳴指：「呢個我要再問下法律意見，可以解決梗係希望解決。不過與此同時，唔係解決佢嘅話，都要起碼堵塞呢個漏洞，如果再有類似事件發生，我哋應該點樣？當然唔一定要重啓逃犯條例，但有無其他方法，令呢個大家都知道的漏洞可以堵塞，我都會考慮一下。」
被問及有何建議方案，管浩鳴認為：「譬如香港可唔可以有域外法權，而家係『屬地』，可唔可以改做『屬人』？大家都可以傾，但始終無理由將個漏洞擺喺度。」
最後問到如果最後當選，是否會將當選消息告訴陳同佳時，管浩鳴指：「呢個所謂域外法權，未必可以引用到佢（陳同佳）身上，我諗講緊可能係未來嘅人。佢（陳同佳）嘅問題要同有關當局傾傾，睇下有無可能喺香港解決。始終話佢係自由人姐，但其實一O的都唔自由。」