【無得去旅行】同你網購熱門手信

受疫情影響,不少人的旅遊計畫都要改期,甚至取消。雖然暫時無得飛,但愛Shop的你,一樣可以網購熱門手信到港,有些更可在香港超市賣得到,掛住日本、台灣味道的你,終於可以一解單思之苦!

去台北,「快車肉乾」可謂必買手信之一,本來在台北車站買得到,但暫時未能親身搜羅,可以在icarry網購,胡椒特厚豬肉乾同蜜汁特厚豬肉乾都係長期煙熱賣款!至於長輩們很喜歡的「老天祿」鴨舌,在lifefoodie.hk有得買,雖然價錢唔平,不過在網站落單,最快4月頭已經收到貨,都可以止下口痕!同網仲有香帥爆漿芋泥卷,是台灣網購人氣甜品之一,蛋糕軟熟綿密,入面的芋泥細滑,加埋少少芋頭粒,用嚟做茶點一流!

至於好多人鍾意買嚟做手信的糖村牛軋糖同海邊走走蛋捲,大家可以喺官網或HKTV Mall預訂到,當中有不同口味和組合,以及禮盒裝方便送禮!

另外,嚟緊是日本櫻花季,計劃好晒又無得飛去賞櫻,真失落!唯有買返啲櫻花產品自我安慰⋯⋯city'super由即日至4月15日舉行櫻花祭,有得買期間限定新產品ROYCE櫻花系列朱古力、櫻花士多啤梨、櫻花大福、櫻花啤酒,同埋各款可用以入饌嘅櫻花調味料、食材等,疫情期間唯有乖乖留在屋企「嘗櫻」吧!


hd