首頁 日報娛樂

「鏡粉」懇求拍《調教你MIRROR 2》 梁祖堯難忘同鏡仔拍拳賽戲拍到喊

16/11/2022
拍劇驚青
■首次正式拍劇的梁祖堯好驚青,最怕跟唔上節奏阻人收工。
拍劇驚青 ■首次正式拍劇的梁祖堯好驚青,最怕跟唔上節奏阻人收工。


46歲梁祖堯(祖祖)處男下海拍攝ViuTV新劇《繩角》,接拍全因角色正、拍攝場地近屋企,同埋可以同MIRROR好兄弟楊樂文(Lokman)、江𤒹生(AK)、王智德(Alton)及邱傲然(Tiger)合作。祖祖激讚鏡仔表演專業,不少拳賽場口打到口水鼻水齊飛,更試過拍到喊。對於已復工的MIRROR,亦師亦友的祖祖鼓勵他們要振作:「點都會畀人話,我諗由得佢(嚴重事故)共存,總有一日會好嘅。」採訪:方騫平

首次正式拍劇的梁祖堯坦言拍《繩角》是一次開心的體驗,劇中他飾演cool爆的拳館教練,因為念舊,永遠着住舊拍檔送嘅風褸,又唔使化妝、整頭髮,開工又近屋企;唯一最唔慣經常要等,又驚跟唔上節奏阻人收工,好彩有好友同場,會拉住AK講戲,大家都熟唔使怕影響對方休息。
鏡仔通宵拍拳賽凍到震

祖祖形容戲裏戲外都好熱血:「戲內我做陪打員,會揸拳靶,訓練時要打佢哋,為求迫真,AK都『食』過我拳,而佢哋拍拳賽時就互『食』,見住佢哋一槌槌打落去,連口水、鼻水、頭髮汗水都飛埋出嚟,佢哋好唔錫身相當專業,效果好好睇。」祖祖不忘大讚鏡仔,用100%力度做好件事,所以成功係有原因。而他最難忘有幾晚通宵喺觀塘碼頭,冒雨拍生死決鬥式拳賽戲,「因為佢哋減肥減到好少體脂,拍攝期間凍到震,加埋傷感情節,睇playback時大家都感動到流晒淚,我好榮幸人生第一套參與咁嘅劇。」祖祖坦言拍出戲癮,有意將執導嘅舞台劇《通菜街喪屍戰》、《隔離童話集》改編成電視劇,最好由原班人馬趙祥誠(Ben)、趙學而及陳凱詠等演出。

提到休團兩個月的MIRROR已復工,祖祖坦言12子在事故中的感受,外人永遠唔會明白,所以寄語他們只要團結必會過到,「難過總會過,正如我喺船上望向企喺碼頭嘅人,見個人愈嚟愈細,但唔等於愈嚟愈唔重要,嗰個人只係變成一粒一點,好似種子咁放喺個心陪住你,係時間拉遠咗距離,唔代表淡咗,我希望佢哋可以振作面對之後嘅路。」
不便回應事故調查報告

意外帶出後遺症,祖祖明白MIRROR調整心態唔容易,「究竟佢哋用乜心態去面對工作呢?係咪出嚟帶住傷痛呢?定將傷悲放埋一邊,可以嘻嘻哈哈出嚟呢?我諗由得佢一齊共存囉,點都會畀人話,總有一日會好嘅。」祖祖最近收到好多鏡粉DM,要求再做《調教你MIRROR 2》,不過他自言唔係心理醫生,唔太適合去做:「或者咁講,佢哋需要我,我點都會喺度!」問到可會擔心意外事件影響鏡仔發展?祖祖就話擔心唔嚟,因為冇得預測,唯一成件事需要好好交代,避免事故再發生,就連舞台劇界都震驚。對於事故報告出爐,祖祖就冇具體回應,只說:「已進入司法程序,任何人唔了解細節都唔應該回應,但情感上我會關心每位傷者,特別係最嚴重嘅阿Mo,希望佢身邊家人、朋友、女友都可以堅強起嚟,面對難過嘅時刻。」毫不錫身■祖祖大讚一班飾演拳手嘅演員唔錫身,落力演出。

毫不錫身■祖祖大讚一班飾演拳手嘅演員唔錫身,落力演出。
請備紙巾■祖祖跟AK喺劇中有大量感動位,賺人熱淚。
請備紙巾■祖祖跟AK喺劇中有大量感動位,賺人熱淚。
重大挑戰■梁祖堯演一位cool爆嘅拳館教練,是喜劇演員最想挑戰的範疇。
重大挑戰■梁祖堯演一位cool爆嘅拳館教練,是喜劇演員最想挑戰的範疇。
眼有淚光■MIRROR 11子於巨星籃球賽後接受傳媒訪問時,Anson Lo一度眼有淚光。
眼有淚光■MIRROR 11子於巨星籃球賽後接受傳媒訪問時,Anson Lo一度眼有淚光。
留下陰影■MIRROR第4場紅館show發生嚴重事故,休團兩個月後已復工。
留下陰影■MIRROR第4場紅館show發生嚴重事故,休團兩個月後已復工。
建立互信■梁祖堯因為《調教你MIRROR》節目,跟鏡仔建立互信。
建立互信■梁祖堯因為《調教你MIRROR》節目,跟鏡仔建立互信。
綜藝能手■祖祖擅長主持綜藝節目,《空肚講宵夜》拍足七季。
綜藝能手■祖祖擅長主持綜藝節目,《空肚講宵夜》拍足七季。

其他文章
hd