首頁 日報娛樂

被封「最強後母」覺得唔好意思 楊卓娜下年結婚一提亡父即爆喊

17/11/2022
■卓娜提到童年未能跟父親好好相處,即淚如雨下。
■卓娜提到童年未能跟父親好好相處,即淚如雨下。


楊卓娜在《美麗戰場》演完衰格後母「芳姨」,搞到老公慘死後,緊接在《超能使者》飾演苦命的「喬若詩」,風水輪流轉被衰老公害死,兩角表現都獲讚。熱愛演戲的她,經歷過抑鬱及推劇的日子,對於演「芳姨」再被揭家事,更獲封「最強後母」,她謙稱對「最強」一詞感汗顏,又計劃明年跟未婚夫完成婚事。講到如擁有超能力,她最想時光倒流,可以回到有爸爸的日子,更邊講邊喊,非常傷感。採訪:杜杜
攝影:譚志光 髮型及化妝:Gipsy Image

訪問當日,剛好是卓娜44歲生日前夕,她笑指生日願望很簡單:「年年都keep住28歲嘅心態,因28歲係有美貌又有智慧嘅年紀,38歲都得,會有啲財富嘅累積囉!哈哈!」雖然近期演兩個角色反應俱佳,但她不期望獎項成為生日大禮,「生日實際啲好,頒獎時離我生日好耐,如果畀我揀,我會揀多啲發揮到戲份嘅角色,較獎項更加緊要,如果冇其他角色承接,變咗停咗喺度,我需要得到更多觀眾嘅掌聲,所以無時無刻都期待好角色。」
埋位就喊拍到似機械人

卓娜曾於訪問中透露,2001年選港姐時發生「批肘事件」,令被抹黑的她對圈中發展感到壓力,埋下患抑鬱症伏線,「嗰時自己傻啫!o依家諗返都係啲雞毛蒜皮事,如果我識得處理,嗰十年我就唔會白過。」卓娜坦承事件後一直不懂享受當演員的樂趣,「做到好灰心,唔識點樣投入,做嚟做去都係啲過鏡,可有可冇嘅角色,更加唔想做,所以我話以前冇演員道德,自從《愛‧回家》之後投入咗,識得點樣去處理情緒。」

卓娜承認試過推劇,幸得未婚夫楊志翹開解才跳出抑鬱陰霾,「試過推啲角色,戲份唔多,但一嚟要我喊,當然我係喊得出,但係我唔享受,好痛苦好似機械人咁,喺工廠啤膠咁啤出嚟,我都想做得好,但問題係冇空間,推完之後又內疚喎!」因為怕影響楊茜堯,所以該段日子冇搵妹妹傾訴,幸有正能量未婚夫在身邊,「佢會開解吓我,係我心靈導師。」
帶三個女去希臘度蜜月
   卓娜2009年為「燈箱大王」楊志翹誕下一女,一直跟對方與遺孀的一對女兒相處融洽,最近《美》劇令她後母身份再被報道,更被封為「最強後母」,她完全不介意,但坦承擔不起「最強」稱號,「我唔覺得自己係最強,呢兩個字令我唔好意思,我都唔係做過啲咩,得到一個咁高嘅榮譽,真係有啲汗顏。」她謂未婚夫看到報道都笑言:「又係呢樣嘢。」

卓娜有計劃明年辦喜事,因為未婚夫經常求婚,「一直都想完成,不過因為好多親人唔喺香港。」她笑指婚禮一拖再拖,三個囡囡已由花女變伴娘。另外,提到想去希臘度蜜月,她依然想預埋三個女,「去歐洲要好長假期,我又唔想去一、兩個星期,好趕咁,去唔到啲咩地方,不過未必適合一家大細去。」
最想媽媽能夠幸福生活

《超》劇中卓娜雖然冇份擁有超能力,但她覺得陳展鵬的角色能停頓時間很有意思,「可能一個決定,一件事會影響成個人生,如果可以停頓一個時間或者可以去返某一個時間嘅空間,已經會改變咗成個故事。」

問到卓娜若可重回人生的某一刻,會選擇那個時候?父親早在她四歲時已離世,一時感觸的她爆喊:「有能力我梗係想有返爸爸啦!」邊抹眼淚的她承認童年缺乏父愛,一直是人生的一大缺口,「我諗童年嘅生活對我成長影響好大,令到我唔夠自信,如果我童年係好完整,我媽媽會好幸福,我希望我媽媽幸福。」■在《超》劇中,卓娜被衰老公所害,遭黑社會掉落街慘死。

■在《超》劇中,卓娜被衰老公所害,遭黑社會掉落街慘死。
■未能在完整家庭成長,令卓娜自小缺乏自信,所以選港姐惹是非即承受不到壓力。
■未能在完整家庭成長,令卓娜自小缺乏自信,所以選港姐惹是非即承受不到壓力。
■卓娜三個囡囡和妹妹楊茜堯,亦有為她慶生。
■卓娜三個囡囡和妹妹楊茜堯,亦有為她慶生。
■《美麗戰場》的後母「芳姨」演得出色,卓娜笑言要多得兩個「衰佬」。
■《美麗戰場》的後母「芳姨」演得出色,卓娜笑言要多得兩個「衰佬」。
■11月10日是卓娜44歲生日,未婚夫楊志翹當然識做陪慶祝。
■11月10日是卓娜44歲生日,未婚夫楊志翹當然識做陪慶祝。
■卓娜跟吳家樂在《超》劇再演夫妻,已是今年內第三套。
■卓娜跟吳家樂在《超》劇再演夫妻,已是今年內第三套。
■卓娜認為童年缺乏父愛,成為她一生遺憾。
■卓娜認為童年缺乏父愛,成為她一生遺憾。
■由楊媽媽獨力照顧長大,卓娜特別愛錫媽咪。
■由楊媽媽獨力照顧長大,卓娜特別愛錫媽咪。
■2001年選港姐,卓娜﹙左﹚因不懂擺甫士被指「批肘」楊思琦﹙中﹚,惹負面新聞。
■2001年選港姐,卓娜﹙左﹚因不懂擺甫士被指「批肘」楊思琦﹙中﹚,惹負面新聞。

其他文章
hd