首頁 日報娛樂

陳山聰預告《超能》勁多親密戲兼玩赤裸 劉穎鏇興奮超肉感三點式場口被期待

18/11/2022
■山聰和Tiffany這兩年來合作無間,早已拍出默契。
■山聰和Tiffany這兩年來合作無間,早已拍出默契。

46歲陳山聰和25歲劉穎鏇(Tiffany)在《超能使者》第四度合作,做完父女、表兄妹,今次就做情侶,仲有勁多親密戲,兩人都話有晒默契唔會尷尬,又預告會有更多身體接觸,山聰甚至有赤裸場口。對於全城期待Tiffany着三點式一幕,當事人堅拒透露播出日期,講明想睇就追劇。翻查資料,Tiffany今年有四套劇播出,有兩套都要着泳衣,女方擁有34吋半D級上圍,TVB當然唔會浪費。
採訪:杜杜 攝影:Stanley 髮型:Seiko Sin Hair@Hair Culture(山聰)、sue Cheung(Tiffany) 化妝:Chloe Yu(山聰)、circle cheung(Tiffany) 服裝:Bespoked_ianchang(山聰)、alice and olivia hong kong(Tiffany) 場地:The Point∼Pizza & Pasta

山聰和Tiffany的關係認真錯綜複雜,先在《大步走》演父女;到《鐵拳英雄》做表兄妹;再在單元劇《回歸光影頌:我的驕傲》做返父女,到今次《超能使者》及未播出的《隱形戰隊》就轉做情侶。山聰唔擔心觀眾接受不到,「我哋係鬥氣先,跟住萌生友情變感情,唔係一出嚟就拍拖好sweet,希望令觀眾快啲忘記嗰啲父女關係。」對於女拍檔愈來愈後生,山聰好風騷,「我可以襯到力捧女神,應該開心嘅。」Tiffany覺得同山聰合作好處是多了個老師,「哈哈!係四字詞語補習老師,因為劇入面佢成日講四字詞語。」她大讚山聰好識用同音字方法來教她讀中文。
劉穎鏇唔要大隻戒甜食

劇中兩人有不少身體接觸,第一場對手戲山聰已經要㩒住Tiffany個胸,「都冇得尷尬,監製同武指都喺現場,佢又咁信任我,呢啲戲一take過拍咗佢仲好,佢有樣嘢好,鬼妹仔又大膽,唔會避忌,同埋我同佢又熟,講清楚我哋就拍。」原來摸胸只屬小兒科,山聰預告嚟緊會更激,「會有更多身體接觸,我仲會赤裸O添!」Tiffany興奮地補充山聰露肉程度都唔弱,不過當然唔夠她穿三點式吸引,連山聰都以「全城期待」嚟形容。

Tiffany對此冇乜壓力,希望大家將焦點放返落劇情,「我唔會好抗拒,希望大家每一集都追,我唔會話畀你知幾時出現,要大家睇足晒。」山聰都加把口:「呢個都係其中一樣秘密武器嚟。」講到身材較2016年參選港姐時更fit,Tiffany承認6年來下過不少苦功,「港姐後有個階段好腫,變咗大隻,上電視會橫幾十倍,睇劇唔鍾意呢個version嘅自己,我想行健康身形,唔係瘦蜢蜢咁。」除了做健身外,她還戒食至愛的甜食,「飲食習慣變咗,冇咁鍾意食甜嘢,以前好鍾意飲珍珠奶茶,都有成年冇飲過。」
對「膠勇」攞獎最有信心

山聰今年有六劇揸手,除了《超》劇,還有《鐵拳英雄》、《金宵大廈2》、《十八年後的終極告白2.0》、單元劇《回歸光影頌:我的驕傲》及《美麗戰場》,成為今年視帝大熱之一,他對奪獎都有一定信心,不過最感激從谷底上返地面後,觀眾仍然好支持,「今年算係陳山聰嘅紀錄,最多劇出街嘅一年,仲要唔係行行企企,最重要冇一個角色重複,仲要得到觀眾嘅喜愛,呢樣嘢比起攞獎更重要。」山聰對重返TVB後的九年有感而發,「大家睇住陳山聰呢九年嘅成長,一定要有信心,唔係行唔到呢一步,最尾攞唔到冇所謂,我已經得到我想得到嘅嘢,就係咁多角色都有唔同人嘅喜愛。」

雖然山聰有信心,但亦知道外界熱捧《下流上車族》的林敏驄,「今年呼聲最高當然係另一個驄哥啦!哈哈!」而他在眾多角色中,對《超》劇「膠勇」睇高一線,「演繹上絕對超乎頭三套劇嘅辛苦,最鍾意嘅角色,亦係比較複雜嘅角色,用咗二百倍能力去做。」■Tiffany這場三點式戲份,引起全城期待。

■Tiffany這場三點式戲份,引起全城期待。
■Tiffany很信任山聰,就算拍㩒胸戲都不會尷尬。
■Tiffany很信任山聰,就算拍㩒胸戲都不會尷尬。
■劇中Tiffany仲有大露背,扮被山聰誤睇全相。
■劇中Tiffany仲有大露背,扮被山聰誤睇全相。
■Tiffany今年仲有在《青春不要臉》,着一件頭泳衣演出。
■Tiffany今年仲有在《青春不要臉》,着一件頭泳衣演出。
■若真的擁有超能力,山聰好希望時光倒流,讓囝囝陳霆軒(Jaco)跟亡父見面。
■若真的擁有超能力,山聰好希望時光倒流,讓囝囝陳霆軒(Jaco)跟亡父見面。
■Tiffany早前為拍《隱形戰隊》,亦以三點式上陣。
■Tiffany早前為拍《隱形戰隊》,亦以三點式上陣。
■山聰有晒心理準備視帝隨時是林敏驄奪得,亦認為對方是實至名歸。
■山聰有晒心理準備視帝隨時是林敏驄奪得,亦認為對方是實至名歸。
■山聰今年多個角色都很突出,其中《十八年後的終極告白2.0》易服演出成為熱話。
■山聰今年多個角色都很突出,其中《十八年後的終極告白2.0》易服演出成為熱話。
■山聰苦練的「米線話」,原來當日佗住BB的太太都有幫手練,Tiffany笑他胎教下,囝囝都應該識講。
■山聰苦練的「米線話」,原來當日佗住BB的太太都有幫手練,Tiffany笑他胎教下,囝囝都應該識講。

其他文章
hd