首頁 日報娛樂

《全城一叮》冠軍奀星追夢血淚史 林子超窮到得幾百蚊 欠阿媽十幾萬

23/11/2022
好想發圍
■林子超希望40歲前,在娛樂圈能有發圍機會。
好想發圍 ■林子超希望40歲前,在娛樂圈能有發圍機會。

32歲林子超(Andy)於TVB節目《全城一叮》中,分別變身妖后跳唱《Lindylicious》及晒肌跳鋼管舞成功突圍,最後跟「孖八」(李俊華)齊奪冠軍,獲總經理曾志偉口頭承諾開劇。由2011年NowTV《CEO選拔賽》入行,霉足12年的林子超終於揚名立萬,提起追夢血淚史,Andy試過戶口得三位數要問阿媽借錢度日,連買杯咖啡都唔敢。 採訪:方騫平 攝影:鄧國良

贏咗《全城一叮》冠軍兼得到拍劇機會,林子超勁開心,賽前唔知道勝出有機會拍劇,製作組只叮囑他要加油,直至曾志偉送出大禮時才呆咗。雖然林子超未收到拍劇消息,但他會靜心等候公司安排,至於冠軍是否有機會孭重飛做主角?林子超說:「又唔敢!只係希望有個好角色,其實有得拍劇已經好開心。」
最霉時唔敢買咖啡飲

童年時林子超寫「我的志願」是做演員,為追夢選擇報讀香港演藝學院的現代舞文憑課程,之後再去新加坡一年進修舞台音樂劇。喜歡做演員的Andy從來唔覺自己靚仔,「我反而覺得自己好特別,如果唔做呢行都唔知做乜,其實o依家嘅演員唔一定高大威猛,只要啱故事就得,所以一直都等緊呢個機會。」

林子超星途崎嶇,做咗「奀星」多年拍劇機會唔多,試過被經理人睇小,又試過戶口得幾百蚊,他憶述追夢慘況仍歷歷在目:「因為唔想喺NowTV做主持被定型而裸辭,最坎坷唔知機會幾時來臨,空窗期曾見過一啲經理人,換嚟一盆冷水『做乜演員呀?都做唔到㗎啦!做主持好過。』但我唔服輸,因為都未畀過機會我,而且嗰時得24歲,仲有時間等機會。」等機會等到戶口得返三位數,「最慘當時全副身家得返幾百蚊,又睇唔到將來條路係點,好彩媽咪好錫我,會主動支持我,個個月攤大手板搵阿媽接濟,講起都唔好意思,好似好不孝咁。」林子超一等就等足兩年,借咗阿媽10幾萬,數簿愈嚟愈厚:「其實我有慳住使,連買杯咖啡都唔敢,轉身走返去便利店買紙包飲品算數。」
試過匿埋喊想做城城

後來林子超獲邀為《Think Big天地》及一間幼稚園教舞,有返穩定收入後再任性地留喺娛樂圈,目標40歲前搵到機會。2017年,有幸演出梅小青監製的劇集《宮心計2深宮計》,飾演被毒殺小人物『陳茗風』,角色都算有人留意,「我分兩年還晒啲錢畀阿媽。」霉等多年,Andy當然有心灰意冷時候,「呢行係消費式工作,學唱歌、跳舞都要錢,自問冇條件做全職演員,有時拍完戲仲要去教舞真係有少少攰,試過匿埋喊,但我係一個永不放棄嘅人,對演戲、跳舞好有火,會堅持,最想梗係成為郭富城啦。」因為心中團火燒到好勁,林子超強調拍劇冇底線,BL題材都唔介意。最後他點名多謝阿Bob拔刀相助:「佢主動幫我兩次,喺佢社交平台post圖文做宣傳,我力量太細,多得佢先至多人認識我,好感恩。」晒肌跳舞■林子超自掏腰包學鋼管舞及操肌,係熱血藝人。

晒肌跳舞■林子超自掏腰包學鋼管舞及操肌,係熱血藝人。
全情投入■林子超工作無底線,要扮到比女人更女人都無問題。
全情投入■林子超工作無底線,要扮到比女人更女人都無問題。
贏得冠軍■林子超贏得《全城一叮》冠軍,滿足感好大。
贏得冠軍■林子超贏得《全城一叮》冠軍,滿足感好大。
被人認識■林子超感恩遇上阿Bob,令他好快就多咗人認識。
被人認識■林子超感恩遇上阿Bob,令他好快就多咗人認識。
拔刀相助■阿Bob喺佢自己嘅社交網中,幫手力推有才華的林子超。
拔刀相助■阿Bob喺佢自己嘅社交網中,幫手力推有才華的林子超。
心口傷疤■因患有先天性心漏病,林子超手術後胸口留下10吋長疤痕。
心口傷疤■因患有先天性心漏病,林子超手術後胸口留下10吋長疤痕。
雙親支持■林子超是家中孻仔,自小得父母疼愛。
雙親支持■林子超是家中孻仔,自小得父母疼愛。
維持生計■林子超抽時間教幼稚園學生跳舞,賺錢養自己。
維持生計■林子超抽時間教幼稚園學生跳舞,賺錢養自己。

其他文章
hd