首頁 日報娛樂

《百萬》演夫妻拍出好感情爆笑互寸 黃德斌眼中只有Jeffrey 娟姐勁呷醋

06/12/2022
■德斌同娟姐再合作更加熟絡,互窒完全唔使畀面。
■德斌同娟姐再合作更加熟絡,互窒完全唔使畀面。

黃德斌和練美娟(娟姐)繼《大叔的愛》演Boss同秘書後,在新劇《百萬同居計劃》關係升級飾演蕭氏夫婦。娟姐興奮表示終於有個精壯男人做伴侶,又狂讚德斌是理想老公人選,以為德斌會回禮讚番佢,但男方竟然讚兩句就冇貨,更冧爆「新歡」Jeffrey(魏浚笙),搞到娟姐呷晒醋,更多口爆埋兩個男人的特殊過癮關係。最後德斌終於讚娟姐唔似角色咁野蠻,因為睇女方隻狗唔會亂吠就知物似主人形,全場爆笑。
採訪:杜杜
攝影:朱偉彥
服裝:Beauty & Youth and Sculptor from ITHK(娟姐)

娟姐坦承德斌演老公絕對是夢想成真,「我不嬲同公司講,畀個精壯男人我,點知有日瞓醒就收到呢個劇本,老公係黃德斌喎,嘩!𦧲飯應!」是否代表肥仔唔夠精壯?娟姐就重申:「對於精壯嘅定義大家都有少少不同,呢個真係好壯健嘅男人,又高大,喺佢隔離好似小鳥依人咁。」被娟姐狂讚的德斌反而質疑對方背稿,「呢啲對白仲唔係背嘅,順到咁樣。」娟姐亦老實不客氣,「我等你讚我,畀咗好多空間你。」德斌唯有讚返「哎吔老婆」:「人又靚、心地又好、非常善良,身材大家有目共睹啦!」
娟姐靠角色滿足對老公幻想

劇中德斌演的生意人「蕭遙」是個愛妻號,希望老婆「蕭萬麗珠」能享福先參加「百萬同居計劃」,本來鍾意講大道理,但一見老婆就收聲,娟姐說:「佢老婆有少少眉頭眼額唔同,佢都即刻o氹,愛妻號即係愛妻號。」娟姐都想有個咁完美老公,「夢寐以求,外形上已經好fit啦,作為女仔,如果你另一半,包容到你嘅野蠻,所有女仔都好鍾意。我都會幻想第時有老公撒嬌嗰時點樣,呢套劇滿足晒我呢啲幻想。」德斌就睇穿娟姐唔似角色咁野蠻,「娟姐唔係咁嘅人,睇佢隻狗就知,物似主人形,佢隻狗從來都唔吠,我想像佢喺屋企比較靜。」不過德斌就否認現實是「蕭遙」級數的愛妻號,「我比較講道理多啲,一啲無道理嘅嘢,我會盡量希望令到佢有道理。」他更讚太太不似蕭太咁無理,「梗係啦,唔係點相處啫!」
Jeffrey開工狂講廢話冇人理

講到同《大叔的愛》班底再合作,德斌認為大家已有一定默契,再加上有新拍檔Jeffrey和霍哥加入,多了很多火花,他更大讚初次合作的Jeffrey,「佢係個好想樣樣做得好嘅小朋友,好有自信、好有準備,唔會錯得去邊,希望佢繼續努力畀啲心機。(好多人話佢演戲有天份?)唔好讚佢啦!佢會囂,佢已經多嘢講,你再讚佢咪更加多嘢講。」

見德斌個慈父冧樣出晒嚟,娟姐搖晒頭個醋罈終於爆!「佢好鍾意Jeffrey,佢哋好冤氣好煩㗎!Jeffrey鍾意講埋啲廢話,台前幕後都冇乜人理佢,真係得我哋兩夫妻會同佢繼續噏落去,所以佢好鍾意捉住我哋講一大堆廢話,好似搵到知音人。」德斌就解釋因Jeffrey能量太高,「佢過度活躍係咁發放,都要搵人接㗎,冇人接好慘㗎嘛。」娟姐再呻,「我一路想得到人稱讚,一路都徒勞無功,真係陰功。」德斌知衰即補鑊讚返娟姐,「戲裏面可愛,出面就好可愛。」不過娟姐依然不滿,「答得麻麻哋,零分重做跪玻璃。」她再爆德斌對Jeffrey的愛,「佢真係好鍾意Jeffrey,佢都有少少貪圖佢美色,成日都話咁靚仔,可能佢喺身上見到自己以前嘅影子。」德斌就唔認同,「邊可能似我呀,見過我舊時嘅人唔會覺得,冇可能我會似佢,佢會嬲㗎!」
電影版冇聲氣轉拍《大伯的愛》

一直有指會開電影版《大叔的愛》,問到兩人有冇收到風,德斌就話未收到消息,娟姐笑指:「要問大叔,大叔點頭先得㗎嘛!」德斌答得抵死:「或者拍套《大伯的愛》,哈哈!」娟姐寸嘴回應:「幫自己諗到咁後,過幾年仲有得撈就叫《大伯的愛》。」搞到德斌嬲嬲哋,娟姐知太唔客氣即補飛,「佢個人好有遠見,幫大家諗之後嗰幾年會有啲咩做,佢o依家都忙緊舞台劇!我已經買咗飛支持!都係佢幫我買咋!(老婆福利?)梗係啦,我諗娟姐都會有呢啲福利,係咪呀?」德斌識做話:「梗係啦,當然啦,點會冇。」最後娟姐終於笑番,「佢冇得say no,我好開心,我好似大王咁,講咩佢都話係。」■劇中「蕭遙」是愛妻號,為老婆「蕭萬麗珠」參加「百萬同居計劃」。

■劇中「蕭遙」是愛妻號,為老婆「蕭萬麗珠」參加「百萬同居計劃」。
■估唔到Jeffrey竟然成為德斌同娟姐之間的第三者。
■估唔到Jeffrey竟然成為德斌同娟姐之間的第三者。
■德斌話自己都算愛妻號,但未至於「蕭遙」的程度。
■德斌話自己都算愛妻號,但未至於「蕭遙」的程度。
■娟姐似乎對「緋聞男友」肥仔演老公有不滿。
■娟姐似乎對「緋聞男友」肥仔演老公有不滿。
■《大叔的愛》時,娟姐演德斌秘書。
■《大叔的愛》時,娟姐演德斌秘書。
■娟姐開心愛犬「烏冬」都有份演出,兩「母子」一齊開工。
■娟姐開心愛犬「烏冬」都有份演出,兩「母子」一齊開工。
■娟姐平時好似好大膽,但同德斌影親密照竟會怕醜,唔敢正眼望兼會面紅。
■娟姐平時好似好大膽,但同德斌影親密照竟會怕醜,唔敢正眼望兼會面紅。
■畀老公抱起呢啲冧爆情景,完全滿足晒娟姐幻想。
■畀老公抱起呢啲冧爆情景,完全滿足晒娟姐幻想。
■德斌讚娟姐身材好,有相為證㗎!
■德斌讚娟姐身材好,有相為證㗎!
■德斌最近為舞台劇《短暫的婚姻》綵排,娟姐已識做買飛支持。
■德斌最近為舞台劇《短暫的婚姻》綵排,娟姐已識做買飛支持。

其他文章
hd