首頁 日報娛樂

激讚軒公如多啦A夢 山旮旯拍戲要乜有乜 魏浚笙招積仔上身洪嘉豪楊天宇爆笑反擊

21/01/2023
■三人一合作就變老友,Kaho就解釋:「我哋都係好玩得,有個小朋友嘅心喺入面,好快就樂也融融。」
■三人一合作就變老友,Kaho就解釋:「我哋都係好玩得,有個小朋友嘅心喺入面,好快就樂也融融。」

三人在戲中都有好多新嘗試,所以拍攝過程相當難忘,Kaho說:「好好彩,同Jeffrey叫做第一套戲試咗好多嘢,又打交、又開槍同吊威哋。」Angus開拍前被導演要求操到《變形俠醫》咁大隻,「我話『吓!打類固醇就得,好難㗎喎!』因為我嗰時拍緊另一套戲,接住拍呢套戲,短時間內好難,同埋亞洲人體質要變《變形俠醫》喎!我盡量大隻,不過套戲只係成日着背心露手臂,得一幕係除衫仲要得嗰兩秒。」
Angus讚Jeffrey堅揪得

戲中Jeffrey除了要騷肌外,仲要為動作場面勤練武功,「練功比較花心思,因為一個唔小心,一拳衝落去,如果你避得唔正確就真係食咗,事前準備都做得好夠。」聽到平時經常認叻的Jeffrey,答唔識打要專登去學,Kaho冷笑一聲:「竟然答唔識!」而Angus亦幫口:「原來佢好有天份,拍完先知自己識囉!即係天生識嗰啲。」Kaho再加多腳,「差在佢任督二脈未俾人打通。」呢個時候Jeffrey再現本性,「師傅教一招,我就耍到出嚟!」

另外跟Jeffrey對打的Angus都承認他堅揪得,「佢真係勁,冇諗過佢會打得傷我,條友好大隻㗎!」Jeffrey尷尬得嚟亦不忘認叻,「唉!有時真係拳頭無眼,為求個認真程度,真係要勁嘛!楊前輩武功都厲害,因為佢本身都有玩開,打鬥方面經驗比我豐富,係強嘅對手。畀個《變形俠醫》讚大隻,真係有少少羞恥,佢嗰種大隻係有少少黐線,係比賽嗰隻健美佬嚟,真係甘拜下風。」

講講吓,Jeffrey再拉埋Kaho落水,「其實豪哥都揪得,差在冇得畀佢發揮。」Angus更笑指Kaho在戲中超捱得打,「佢成日畀人打,但係都死唔去㗎!佢呢吓勁嘛!我有一幕成個錘仔爆佢個頭,佢都冇事,勁呀!學唔到佢。」Kaho就自爆雖然不用騷肌卻另有任務,「當然佢兩位係大隻除衫,但係唔好忘記,我喺呢套戲係除過褲嘅,因為我要去廁所就除褲,故事就係咁發生。」Jeffrey笑他,「你大隻除衫,我大抽咪除褲囉!哈哈!」Kaho無咁好氣話:「我係唔夠大隻,我咪除褲囉!」
軒公從不呻辛苦

三人互寸一輪後,一講跟軒公合作即變得好恭敬。被軒公視為細佬的Kaho首次在戲劇上跟大佬合作,一樣讚不絕口,「佢好認真,比我哋更加鑽研得深,有時我哋都收貨,佢會話仲可以點樣再好啲,好坦白講我30歲拍呢套嘢都覺得辛苦、吃力,我私底下都有問佢哋(Jeffrey及Angus),係咪因為我老先至覺得辛苦,佢哋都話覺得好辛苦,但係我未聽過軒公講一句辛苦,佢係主角嚟,我就算call得早9點到,佢已經拍完幾場,呢個真係佩服。」

早前先冧完黃德斌的Jeffrey,今次又畀軒公冧到,「我發掘到軒公有顆童真嘅心,佢好善良,好好嘅人,真係very good,頂瓜瓜。」問到軒公好在哪?Jeffrey繼續賣口乖,「不如講唔好嘅位,係冇嘅,所以好嘅位係全部,簡直係完美。」不過究意德斌兄好定係軒公正呢?Jeffrey世界仔上身,「兩個都係十分之體貼後輩嘅人嚟,都好好。(以為你變咗心?)唔會啦!好人唔會得一個嘛!全世界都有好人。」

Angus就透露軒公除了鏡頭前認真,鏡頭後亦相當細心,「佢係超級溫暖,好識關心人,我有場戲整傷咗隻手,佢見我喺度敷冰唔出聲,佢走埋嚟問我有冇事,我印象中佢好似多啦A夢咁,可以喺半個鐘就搵到啲嘢畀你,佢可以搵到支活絡油,又搵到一排止痛藥,但係我哋嗰時喺山旮旯拍喎!跟住有個演員把聲沙咗,佢又可以搵到啲清音丸,仲要佢畀完你後,下次仲會問你有冇事囉!佢係真係關心你先至會咁做,好上心!」
■三子雖然訪問不時互寸,但其實好有愛嘅。

■三子雖然訪問不時互寸,但其實好有愛嘅。
■戲中Jeffrey同軒公、白只一齊裸跑,大晒爆肌身材。
■戲中Jeffrey同軒公、白只一齊裸跑,大晒爆肌身材。
■Jeffrey解構演的武癡「企鵝」,「係正義到癲,同埋好鍾意武功嗰種癲。」
■Jeffrey解構演的武癡「企鵝」,「係正義到癲,同埋好鍾意武功嗰種癲。」
■Kaho講角色「啫喱」,「我癲啲嘢係好超現實,係比較無厘頭啲,因為角色經歷咗一啲正常人經歷唔到嘅嘢。」
■Kaho講角色「啫喱」,「我癲啲嘢係好超現實,係比較無厘頭啲,因為角色經歷咗一啲正常人經歷唔到嘅嘢。」
■Angus眼中演的「雞春」,「長期慢半拍,同正常人嘅節奏係夾唔到,即係成日都錯拍,同埋會完全唔出聲。」
■Angus眼中演的「雞春」,「長期慢半拍,同正常人嘅節奏係夾唔到,即係成日都錯拍,同埋會完全唔出聲。」
■Jeffrey(右)同Angus同樣為電影操到好大隻,手瓜起𦟌。
■Jeffrey(右)同Angus同樣為電影操到好大隻,手瓜起𦟌。
■Kaho(右)讚大佬軒公專業又細心,更為他慶祝生日。
■Kaho(右)讚大佬軒公專業又細心,更為他慶祝生日。
■電影中,Kaho跟Jeffrey飾演保安員,同樣是軒公下屬。
■電影中,Kaho跟Jeffrey飾演保安員,同樣是軒公下屬。

其他文章
hd