首頁 日報娛樂

老公患癌 因政見同家人吵大鑊 肥媽壓力爆煲撼頭埋牆

16/09/2019
合十祈求
■肥媽身心俱疲已不問世事,亦祝願香港早日回復以前一樣。
合十祈求 ■肥媽身心俱疲已不問世事,亦祝願香港早日回復以前一樣。(1/10)

  「肥媽」(Maria Cordero)自7月20日擔任「守護香港」集會主持人,豎起拇指「俾Like」支持香港警察後玩「深潛」。日前肥媽罕有出席一間金行的周年晚宴,她接受訪問時強烈否認「721元朗恐襲」事件後同警察割席,自爆因為老公病重,加上同家人因政見不同而經常炒大鑊,情緒失控的她不時爆喊,甚至撼頭埋牆而嚇親家人,目前要服用精神科藥物控制病情,亦被禁睇新聞,子女更勒令她不要多事!         採訪:方騫平 鳴謝:富麗華珠寶金行

        前周三,瘦了一個碼的肥媽帶埋老公為相熟珠寶金行擔任周年晚宴表演嘉賓,又唱又跳改編自劇集《難兄難弟》主題曲的《We like HK》來唱好香港,之後再唱《月亮代表我的心》及跟漢洋合唱《東方之珠》,全程表現興奮,更有師奶粉絲握實肥媽手「集郵」,老公就安靜地坐喺台下欣賞。肥媽有感而發說:「《東方之珠》係唱我哋嘅香港,每個地方都有高有低,但香港點都係一塊福地!意見唔同唔緊要,最緊要坐低一齊去傾。」當問到肥媽點睇o依家香港社會狀況時,她竟說唔多清楚,自己已不問世事,坦言「o依家我乜都唔理。」

困擾睇心理醫生

  肥媽自爆:「屋企有32位成員,一向融洽相處,佢哋有啲中立、亦有唔同顏色,部份立場激進,有次成家人睇新聞,結果釀成激烈爭吵,你知我好霸道唔會畀人講嘢㗎啦,愈鬧愈嘈,當時我情緒好激動爆喊叫停,但嗌極都無人肯收聲,真係唔知點算好,唯有撼頭埋牆自殘,撼到後腦起『樓』嚇親屋企人。」另外肥媽原來近兩年一直陪住患有肺癌的老公進出醫院。「由1月至今留咗6次院,私家醫院醫療費超過600萬,但唔緊要,老公好叻,比醫生估計得返一年壽命更長。所以嗰排心情衰到不得了,壓力大到連手都震埋。最後要睇心理醫生尋求專業治療。醫生專業建議,解決呢類情緒困擾,屋企人需要圍埋一齊坐低傾,就算唔明佢哋嘅諗法,接受與否唔重要,都可以好嬲咁講出自己感受、同時畀對方發聲,咁做係愛惜大家睇法,然後一齊達成共識。」

願香港早日病瘉

  肥媽同家人為怕影響感情,已協議唔再睇電視新聞。「我哋變返和平共處,但喺協議下,如我要出席一啲有立場嘅公開活動,係要得到家人同意,相反,佢哋都唔會參與。」今次事件令肥媽學會要互相尊重大家想法:「佢哋唔使改變我,我亦都未必認同佢哋見解,始終冇人啱晒,亦冇人會錯晒!所以單睇警民衝突片段不能作準,評論亦唔公平。最緊要控制到情緒,好彩經已由兩粒藥減到只係食一粒,不過仲要長期服用。」她慨嘆說:「我只係得一個信念,香港快啲變返以前嘅香港,大家團結一致。」

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd