首頁 日報娛樂

愛犬離世 寵物店搵「新成員」 凍齡人夫苗僑偉Man爆護素顏愛妻

10/10/2019
等太太攞狗
■三哥一早去寵物店ready取新買小狗,等埋愛妻到達,恩愛夫婦再happy玩多成個鐘才走人。
等太太攞狗 ■三哥一早去寵物店ready取新買小狗,等埋愛妻到達,恩愛夫婦再happy玩多成個鐘才走人。(1/11)

        神級凍齡人夫苗僑偉(三哥),去年已「登六」,但外貌勁保鮮,型過唔少小生。月前,其索囡苗彤喺社交網誌貼出剛過身嘅愛犬黑白相,傷心悼念。日前,愛心狗主三哥約愛妻戚美珍前後腳抵銅鑼灣一間寵物店,為屋企添「新成員」。見型夫在店內玩抱小狗,笑得好開心。其後,三哥發現有本報記者,怕愛妻素顏上鏡,即出門與記者吹水,man爆護太太呀!



縱橫影視圈40年嘅三哥常有佳作,繼月前佢同劉德華、古天樂主演嘅電影《掃毒2天地對決》叫好叫座,近日亦有部邵氏網劇《飛虎之雷霆極戰》在內地熱播,帶挈《飛虎2》導演李惠民喺過去釜山舉行嘅第一屆「Asia Contents Awards」頒獎典禮中獲得「終身成就獎」。監製樂易玲仲公告喜訊,下年年初會開拍《飛虎III》。

逗玩小狗逾兩小時

近日正開拍無線新劇《使徒行者3》嘅三哥,日前唔使開工,就偕助手現身銅牌灣近總統戲院嘅寵物店。一向愛狗如命,先後養過牧羊狗、鬆獅犬等嘅三哥在店內逗玩小狗。其間見佢抱起一隻黑色小狗,似抱BB咁溫柔呵護。狗奴三哥又不時與店主大講養狗經,一傾就成個鐘,快樂不知時日過。其後,零妝三嫂揸車抵達,「愛妻號」三哥即叫司機幫忙搵位泊車,等埋愛妻一齊入寵物店後,三哥笑容更多、笑得更燦爛。恩愛夫婦輪流抱玩店內小狗,話咁快又過多一個鐘。

此時,三哥發現本報記者在門外,即向素顏愛妻通水,着太太背對門口坐,然後走出門與記者埋身吹水。三哥先笑問記者有乜好影?然後友善說:「嚟買狗糧之嘛!」其後,三哥折返舖頭,跟店主傾多廿分鐘,就拎住啲文件、一袋狗糧及寵物用品,抱住一隻深色小狗離開,似同老婆成功揀中「新成員」,可以畀個surprise身在溫哥華嘅囡囡啦!

本報記者

其他文章

hd