首頁 日報娛樂

經常網上晒肉激死王敏德 曼喜麗嘉不靠父蔭靠自己

12/10/2019
各自發展
■26歲王曼喜和24歲的王麗嘉各自向自己的目標進發。
各自發展 ■26歲王曼喜和24歲的王麗嘉各自向自己的目標進發。(1/10)

        王敏德(Michael)和名模馬詩慧(Janet)的26歲大女王曼喜(Kayla)和24歲細女王麗嘉(Irisa),遺傳媽咪的超模身形,早被封為索爆星二代。因為兩姊妹經常在網上貼性感相,激到型男老竇紮紮跳而被網民熟識。179cm高的Irisa步媽咪後塵,進軍model界,而家姐Kayla則謙稱只有171cm不夠高,故在大學修讀Design的她,2015年創業成立時裝品牌及開設網店售賣公平交易的服裝。對於自己所走的路,兩姊妹均稱父母好支持,「佢哋唔會好似怪獸家長咁要我哋做醫生做律師,反而鼓勵我哋發揮所長做自己鍾意嘅嘢」。



Kayla及Irisa的父親是城中型男王敏德,母親馬詩慧又是香港數一數二的殿堂級名模,對於父母是名人,兩姊妹卻形容:「冇乜特別,細個都唔知佢哋係名人,到中學或者o依家,啲朋友話成日睇Daddy嘅《飛虎》。」Irisa接着說:「以前讀書時啲老師成日讚我daddy好靚仔。」問到點睇Daddy樣貌?Irisa說,「佢真係幾靚仔,仲好好身材,我明白媽咪點解會同佢拍拖。」由細到大,她們稱父母從不偏心,更不會只錫晒19歲細佬王躍穎(Kadin),對她們所做的事更是百分百支持。

網店開拓新巿場

Kayla於2015年創業,她說:「其實我讀大學時已想創業,畢咗業返港後做咗一陣嘢,覺得唔係好適合,就決定開時裝網店。」做了3年,Kayla坦言投資了約50萬港元,幸反應不俗,她說:「E shop都做得唔錯,暫時香港客多啲,嚟緊都會開拓海外巿場,會先試台灣,(仲有冇新project?)o依家主要想做customer order嘅嘢,例如同啲company做啲crossover嘅衫,呢個service都想畀多啲人知道我哋係有做。」現時網店的T恤約有40款,平均$250一件。父母有支持嗎?她坦言daddy媽咪成日都有着,又會畀意見,「daddy可能係business方面多啲,又會問我做成點;而媽咪就係design上。」T恤設計以簡約為主,並由Kayla一手包辦,問妹妹Irisa有幫她手嗎?她笑言:「佢幫我做model囉。」

自小志願做超模

提到做model,問Kayla點解唔繼承媽咪衣鉢,她解釋:「媽咪之前話我唔夠高,因為做fashion model係有個標準,好似佢(Irisa)咁嘅身形先做到。」Irisa稱13歲已經想做Model,並封媽咪為偶像,Kayla透露妹妹的志願是成為美國著名內衣品牌Victoria's Secret的超模,Irisa續說:「其實我o依家係意大利內衣品牌Intimissimi嘅代言人,之前有去Milan啲Agency,但佢哋話我24歲太老,因為佢哋o依家鍾意簽嗰啲15、16歲。」因為她想讀完書先開始做Model,估不到畢咗業又被人指太老,問到有無後悔?Irisa答得無奈,「都有少少,但我覺得仲有其他機會嘅,只係如果早少少開始可能會好啲。」

兩姊妹偶有鬧交

好多星二代都會染指歌影視,Irisa坦言有機會都想拍電影,「唱歌一定唔會。」問到有否在港簽Agency?她笑言媽咪就是她的經理人,所賺的錢全部入晒媽咪戶口?她笑笑口說:「咁又唔係嘅。」提到Keep fit之道,Kayla表示她易肥易瘦都要keep,要少食澱粉質和甜品,但Irisa唱反調說:「我唔係好keep fit㗎!想食咩就食咩,但其實我都會肥,可能高冇咁明顯,(有冇試過突然間好肥?)讀大學第一年時勁肥,我返港時媽咪見到都嚇親,跟住唔畀我食嘢,係咁叫我做gym。」提到兩姊妹感情好好,Kayla即笑說:「唔係,都有打交,但都唔記得以前為咩打,可能只係爭睇電視。」Irisa續說:「大個唔會打,但會鬧交。」講到跟細佬的感情?Kayla說:「以前細個close啲,大個溝通方式唔同咗,佢唔會答你一條太長嘅問題。」Irisa接着說:「問佢嘢,一兩個字答完你。」有指Kadin想入行拍電影,這豈不是要訓練一下?兩姊妹即異口同聲說:「唔係吖,佢淨係對我哋係咁咋,佢同其他人好多嘢講,對住daddy媽咪啲朋友,仲social過我哋。」為維繫一家人感情,Michael和Janet每年會盡量安排family trip享天倫之樂。

撰文:李佩儀

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd