首頁 日報娛樂

朱晨麗投訴牀戲主動除衫 洪永城澄清:我有着褲㗎!

13/12/2019
■朱朱同Tony呢對,相當有喜感,相信觀眾都會鍾意。
■朱朱同Tony呢對,相當有喜感,相信觀眾都會鍾意。 (1/7)

  朱晨麗(朱朱)和洪永城(Tony)最近在劇集《多功能老婆》這一對相當出位,一時打打鬧鬧;一時又熱情到暈。兩人首演夫妻,都話有時拍親熱戲都覺尷尬,講講吓朱朱仲突然投訴Tony在一場牀戲中自動波除衫,搞到朱朱要搵張被包住自己,避免有肌膚之親,而Tony就澄清自己有着褲,只是想似平日瞓覺,兩人訪問全程鬥咀,戲內戲外一樣咁有火花。撰文:杜淑霞

攝影:李維隆 髮型:Steve Shek @HAiR(朱晨麗)  化妝:Herman Ng(朱晨麗)

服裝:Magazzin Group(朱晨麗)、 FiveCM(洪永城)

  朱朱和Tony上次合作是在劇集《味想天開》,朱朱笑言今次Tony身份升咗呢,「上次佢做我阿哥,今次佢升咗呢做我老公啦!」Tony即寸嘴話:「咁下次你做我阿媽啦!」互窒不留情,就知他們有幾熟絡。談到劇中兩人有不少親熱戲,他們都話有時都會好尷尬,朱朱更投訴Tony牀戲唔着衫,「嗰日我哋有場牀戲,佢突然唔着衫呀!」Tony就急忙解釋,「咩呀!我只係冇着衫啫!我有着褲㗎!」朱朱再呻:「我即刻用張被包住自己,費事掂到佢呀!」Tony再解釋:「咁平日瞓覺我都係唔着上半身,只係想生活化啲啫!」

叫何廣沛努力

  講到劇中朱朱演的「思蕾」恃靚行兇食住老公「偉立」,朱朱就話平日唔會咁樣攞着數,「我連喺街巿攞棵葱都冇試過喎!」Tony都力撐朱朱唔會咁做,「佢應該唔會咁嘅,佢都好少要人就佢嘅。」朱朱笑言:「其實我係男人嚟,唔興做呢啲嘢㗎!」問到Tony將來結婚會唔會似個角色一樣是個老婆奴,他就堅稱一定唔會,朱朱都認同話:「Tony好堅持同有主見,應該唔會畀老婆要脅到。」他們都話拍完這套劇,學到點樣做人老婆老公,不過Tony就話仲未有計劃做人夫,「我同女朋友(梁諾妍)係朝呢個方向行,但真係未有計劃。」而朱朱就堅稱未有對象,仲笑言叫緋聞男友何廣沛要努力啲。講到邊個夠資格做多功能老婆,Tony就大讚除了千嬅,陳煒都是男人夢想的多功能老婆。朱朱就話自己未夠資格,「我煮飯真係唔叻,但會努力學習。」

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd